प्रभात वृत्तसेवा
तळेगाव दाभाडे – तळेगाव दाभाडे नगरपरिषद सन २०२५ च्या निवडणुकीची तयारी वेगात सुरू असून, मतदारांना मतदानासाठी सोयीस्कर सुविधा उपलब्ध व्हाव्यात यासाठी मुख्याधिकारी ममता राठोड यांनी सोमवारी (दि. ३) मतदार केंद्रांची पाहणी केली.नगरपरिषद निवडणुकीसाठी प्रारूप प्रभाग रचना आणि प्रारूप मतदार यादी यांसारखी महत्त्वाची कामे पूर्ण झाली असून, ती शासनाच्या आदेशानुसार नगरपरिषद कार्यालयात प्रसिद्ध करून कायम करण्यात आली आहेत.

नगरपरिषदेने अंतिम मतदार यादी ३१ ऑक्टोबर रोजी प्रसिद्ध केली असून, अंतिम मतदान केंद्र यादी शुक्रवारी (दि. ७) प्रसिद्ध करण्याचे निर्देश निवडणूक आयोगाकडून प्राप्त झाले आहेत. या अनुषंगाने प्रभागनिहाय मतदारसंख्येनुसार मतदान केंद्रनिहाय यादी विभाजनाचे काम सुरू आहे.

मुख्याधिकारी ममता राठोड यांनी सांगितले की, मतदारांना त्यांच्या जवळच्या मतदान केंद्रावर सहज मतदान करता यावे, यासाठी योग्य नियोजन करण्यात येत आहे. तळेगाव दाभाडे नगरपरिषद क्षेत्रात एकूण ६४ हजार ६७८ मतदार असून, प्रत्येक मतदान केंद्रावर सुमारे ९०० ते १००० मतदार असतील, अशी योजना आखण्यात आली आहे. त्यामुळे एकूण ७१ ते ७२ मतदान केंद्रे निश्चित केली जाण्याची शक्यता आहे.