Talegaon Dabhade – तळेगाव दाभाडे नगरपरिषदेकडून मालमत्ता कर वसुलीसाठी कठोर उपाययोजना हाती घेण्यात आल्या आहेत. थकीत कर न भरल्यास संबंधितांची मालमत्ता जप्त करण्यात येईल, असा इशारा प्रशासनाकडून देण्यात आला आहे. मुख्याधिकारी गिरीश दापकेकर आणि उपमुख्याधिकारी ममता राठोड यांच्या मार्गदर्शनाखाली कर अधिकारी कल्याणी लाडे वसुलीसाठी प्रयत्नशील आहेत. या मोहिमेसाठी नगराध्यक्ष संतोष दाभाडे पाटील, उपनगराध्यक्ष गणेश काकडे तसेच सर्व प्रभागातील नगरसेवकांचे सहकार्य घेतले जाणार आहे. ३१ मार्च २०२६ अखेर ३८ कोटी रुपयांच्या करवसुलीचे उद्दिष्ट नगरपरिषदेसमोर आहे. त्यापैकी पाच कोटी रुपये न्यायालयीन प्रकरणांत अडकले असून उर्वरित ३३ कोटी रुपये वसूल करायचे आहेत. आतापर्यंत १३ कोटी ३२ लाख रुपये जमा झाले असून उद्दिष्ट पूर्ण करण्यासाठी अवघे ३२ दिवस शिल्लक आहेत. त्यामुळे थकबाकीदारांवर कडक कारवाईचे संकेत देण्यात आले आहेत. वसुलीसाठी जप्ती नोटीस बजावणे, मालमत्ता सील करणे, नळजोड खंडित करणे अशा कारवाया सुरू आहेत. तसेच अभय योजनेअंतर्गत ३१ मार्चपूर्वी संपूर्ण थकबाकी भरल्यास दंडात्मक व्याजातील २ टक्के सवलतीचा प्रस्ताव शासनाकडे पाठविण्यात आला आहे. नागरिकांच्या सोयीसाठी नगरपरिषदेच्या नवीन इमारतीत शनिवार-रविवारीही कर स्वीकारला जाणार असून रोख, धनादेश, आरटीजीएस, एनईएफटी, पॉस मशीन व ऑनलाइन पद्धतीने भरणा करता येणार आहे. दरम्यान, पाणीपट्टी वसुलीचे नऊ कोटी रुपयांचे उद्दिष्ट असून आतापर्यंत ३ कोटी २९ लाख रुपये जमा झाले आहेत. नगरपरिषदेच्या हद्दीत १८ हजार ३५९ नळजोड असून थकीत आणि अनधिकृत जोडांवर कारवाई सुरू असल्याची माहिती पाणीपुरवठा विभागप्रमुख अभिषेक शिंदे यांनी दिली.
