नवी दिल्ली : भाजपचे खासदार रवी किशन यांनी एका हिंदी वृत्तवाहिनीच्या कार्यक्रमामध्ये सहभागी झालेले गोरखपूर लोकसंख्या नियंत्रण विधेयकासंदर्भात मतप्रदर्शन केले. यावेळी रवी किशन यांनी बोलताना यापूर्वीच्या सरकारने यासंदर्भात अधिक जागृत राहणं आवश्यक होते. त्यांनी लोकसंख्या नियंत्रण कायदा आणला असता तर आज मला चार मुलं नसती, असे म्हटले आहे.

लोकसभेमध्ये आपण यासंदर्भातील चर्चेसाठीचा प्रस्ताव मांडणार आहोत असेही रवी किशन  म्हणाले. इतकच नाही तर आता आपण जेव्हा लोकसंख्या वाढीबद्दल विचार करतो तेव्हा चार मुलं असल्याचा पश्चाताप होतो, असेही रवी किशन  यांनी या कार्यक्रमात म्हटले. “काँग्रेसने यापूर्वीच विधेयक आणलं असतं तर आम्ही थांबलो असतो. मला चार मुलं आहेत पण ही काही चूक नाही. काँग्रेसने आधीच विधेयक आणलं असतं आणि असा कायदा असता तर आम्हाला चार मुलं नसती,” असे देखील रवी किशन म्हणाले.

काँग्रेसने लोकसंख्या नियंत्रणासंदर्भातील कायद्याबद्दल फार गांभीर्याने विचार करण्याची गरज होती. “यासाठी काँग्रेसला दोषी धरलं पाहिजे कारण तेव्हा सत्तेत त्यांची सरकार होती,” असे लोकसंख्या नियंत्रण कायद्यासंदर्भात स्वत:च्याच चार मुलांचा उल्लेख करत रवी किशन  यांनी सांगितलं. तसेच “आम्हाला याची कल्पना नव्हती”, असेही लोकसंख्येसंदर्भातील भाष्य करताना भाजपा खासदाराने म्हटले.

रवी किशन यांनी चीनचा उल्लेख करताना चीनने लोकसंख्या नियंत्रणात आली आहे, असे म्हटले. आधीच्या सरकारने विचापूर्वक निर्णय घेतले असते तर अनेक पिढ्यांना हा संघर्ष करावा लागला नसता. आता या विषयावरुन आरोप प्रत्यारोप होतील मात्र त्याचा आता काहीही उपयोग नाही. या कायद्याचं फलित २० ते २५ वर्षांपूर्वीच दिसायला हवं होतं, असेही रवी किशन यांनी म्हटले. रवी किशन यांनी विद्यमान सरकार केवळ मंदिरं उभारत नसल्याचे सांगताना रस्त्यांची मोठ्या प्रमाणात बांधणी झाल्याचे म्हटले. तसेच इकॉमिक कॉरिडोअर निर्माण करताना शिक्षणसंस्थांचीही निर्मिती करण्यात आल्याचं रवी किशन यांनी म्हटले.