पुणे – दौंड तालुक्यातील गोपाळवाडी जिजामाता नगर परिसरात उकिरड्यावर प्लास्टिक बरण्यांमध्ये अर्भके व मानवी शरीराचे अवयव आढळून आल्याच्‍या धक्‍कादायक प्रकारावरुन राज्यात सोनोग्राफी सेंटर व हॉस्पिटलच्या माध्यमातून अवैधपणे गर्भलिंनिदान चाचण्या व गर्भपात सुरु असल्याचे पुन्हा एकदा अधोरेखित झाले आहे.

त्‍या पार्श्वभूमीवर राज्यात गर्भलिंगनिदान प्रतिबंधक कायद्याची प्रभावी अंमलबजावणी करण्यात यावी. तसेच गर्भलिंगनिदान चाचणी करणाऱ्या सोनोग्राफी सेंटर व हॉस्पिटलवर छापेमारी करून कठोर कारवाई करण्यात यावी, अशी मागणी महाराष्ट्र प्रदेश युवक काँग्रेसचे सरचिटणीस रोहन सुरवसे-पाटील यांनी सार्वजनिक आरोग्य व कुटुंब कल्याण मंत्री प्रकाश आबिटकर यांच्याकडे निवदनाद्वारे केली आहे.

ज्या रुग्णालयात अथवा सोनोग्राफी सेंटरमध्ये बेकायदेशीररित्या गर्भलिंगनिदान चाचण्या केल्या जातात. अशा ठिकाणी छापेमारी करून कठोर कारवाई करण्यात येईल. अशा प्रकारच्‍या सूचना प्रशासनाला केल्या आहेत, असे आश्वासन मंत्री आबिटकर यांनी दिल्‍याचे सुरवसे-पाटील यांनी सांगितले.

दरम्‍यान, पुणे शहर, पिंपरी चिंचवड आणि जिल्ह्याच्या ग्रामीण भागात सोनोग्राफी सेंटर मधून गर्भनिदान चाचण्या होत आहेत का नाही याबाबत तपासण्या आणि चौकशी होणे गरजेचे आहे. दोषी आढळणाऱ्या केंद्रांवर कारवाई होणे गरजेचे आहे, असेही सुरवसे-पाटील म्‍हणाले.