Taapsee Pannu Assi Film Trailer: 2026 ची सुरुवात बॉलीवूडसाठी जोरदार ठरत आहे. ‘बॉर्डर 2’ आणि ‘मर्दानी 3’नंतर आता तापसी पन्नूची नवी फिल्म ‘अस्सी’ चर्चेत आली आहे. या चित्रपटाचा ट्रेलर नुकताच रिलीज झाला असून तो पाहणाऱ्यांना अक्षरशः हादरवून सोडतो.

‘अस्सी’चा ट्रेलर रिलीज

चित्रपटाची टॅगलाईन आहे, “त्या रात्री ती घरी पोहोचलीच नाही…” या एका ओळीतच संपूर्ण कथेची गंभीरता दिसून येते. ट्रेलरची सुरुवात एका भीषण घटनेने होते आणि त्यानंतर कथा थेट कोर्टरूम ड्रामाकडे वळते.

या चित्रपटात तापसी पन्नू एका वकिलाची भूमिका साकारताना दिसते. ती एका बलात्कार पीडितेला न्याय मिळवून देण्यासाठी न्यायालयात लढा देते. ट्रेलरमधील तिचे संवाद, देहबोली आणि डोळ्यांत दिसणारा संताप चित्रपटाची तीव्रता अधिक वाढवतो.

कथेची झलक

ट्रेलरनुसार, एक मुलगी रात्री घरी जात असताना काही लोक तिला जबरदस्तीने गाडीत बसवतात आणि तिच्यावर अत्याचार करतात. नंतर तिला रस्त्यावर फेकून दिलं जातं. यानंतर सुरू होतो न्यायासाठीचा संघर्ष.

चित्रपटात दाखवण्यात आलं आहे की अनेक बलात्कार प्रकरणे नोंदवलीच जात नाहीत किंवा कायदेशीर गुंत्यात अडकून बाद होतात. ‘अस्सी’ हा चित्रपट प्रश्न विचारतो, व्यवस्था खरंच पीडितेच्या बाजूने उभी राहते का, की तिलाच आरोपीच्या पिंजऱ्यात उभं केलं जातं?

तापसी पन्नूचा प्रभावी अभिनय

‘पिंक’, ‘थप्पड’, ‘मुल्क’सारख्या सामाजिक विषयांवरील चित्रपटांनंतर तापसी पुन्हा एकदा मजबूत आणि निर्भय भूमिकेत दिसते. ‘अस्सी’मध्ये तिचं पात्र संताप, संवेदना आणि संघर्ष यांचा प्रभावी संगम आहे.

या चित्रपटात जीशान अय्युब, मनोज पाहवा, कुमुद मिश्रा, सुप्रिया पाठक, सीमा पाहवा, नसीरुद्दीन शाह, रेवती आणि कानी कुसृति यांसारखे दिग्गज कलाकारही आहेत.

कधी होणार रिलीज?

अनुभव सिन्हा दिग्दर्शित ‘अस्सी’ हा चित्रपट 20 फेब्रुवारी रोजी चित्रपटगृहात प्रदर्शित होणार आहे. ट्रेलर पाहता, हा चित्रपट केवळ मनोरंजन नाही तर समाजाला विचार करायला भाग पाडणारा ठरणार आहे.

ट्रेलरनंतर सोशल मीडियावरही ‘अस्सी’ची जोरदार चर्चा सुरू असून अनेकजण या चित्रपटाला वर्षातील सर्वात प्रभावी चित्रपटांपैकी एक मानत आहेत.