नवी दिल्ली : टी-20 विश्वचषकाच्या अत्यंत महत्त्वाच्या सामन्यात रविवारी न्यूझीलंड आणि अफगाणिस्तानचे संघ आमनेसामने येत आहेत. भारतीय संघाच्या उपांत्य फेरीत प्रवेश करण्याच्या सर्व आशा या सामन्यावरच टिकून असून यामुळे सर्वांचेच लक्ष न्यूझीलंड विरुद्ध अफगाणिस्तान सामन्यावर लागून आहे. या सामन्यात टीम इंडियासोबतच कोट्यवधी भारतीयही अफगाणिस्तानच्या विजयासाठी प्रार्थना करतील. अफगाणिस्तानसाठी देखील हा सामना जिंकणे अत्यंत महत्त्वाचे आहे.

अफगाणिस्तानकडून संपूर्ण देशाला आशा

न्यूझीलंड जिंकल्यास उपांत्य फेरीचे दरवाजे भारतासाठी बंद होतील, कारण न्यूझीलंडचे आठ गुण होतील आणि शेवटचा सामना जिंकूनही भारताला तितके गुण मिळवता येणार नाहीत. अफगाणिस्तानने न्यूझीलंडला हरवल्यास त्यांच्या माफक आशा कायम राहतील तर भारताच्या संधी मजबूत होतील, शेवटचा सामना चांगल्या फरकाने जिंकावा लागेल. न्यूझीलंड जिंकल्यास भारताचा नामिबियाविरुद्धचा शेवटचा साखळी सामना औपचारिक राहील.

न्यूझीलंडकडूनही धोखा –

शुक्रवारी नामिबियाला पराभूत केल्यानंतर न्यूझीलंडचा संघ मोठ्या आत्मविश्वासात आहे. जिमी नीशम आणि ग्लेन फिलिप्स यांनी अपयशातून सावरताना संघाला चांगली धावसंख्या मिळवून दिली. न्यूझीलंडची जबरदस्त गोलंदाजी अफगाणिस्तानच्या फलंदाजांसाठी अडचणीची ठरेल. अफगाणिस्तानच्या फलंदाजांनी आपल्या फिरकी गोलंदाजांच्या जोरावर आतापर्यंत चांगली कामगिरी केली आहे. त्यांच्या फलंदाजांना आता ट्रेंट बोल्ट, टीम साऊदी, वेगवान गोलंदाज अॅडम मिल्ने आणि फिरकीपटू इश सोधी आणि मिचेल सँटनर यांच्याशी सामना करावा लागणार आहे.

-रशीद अप्रतिम कामगिरी करू शकतो

अफगाणिस्तानच्या फलंदाजांनी चांगल्या धावा केल्यास रशीद खानच्या नेतृत्वाखाली गोलंदाज चांगली कामगिरी करू शकतात. फलंदाजीत न्यूझीलंडला मार्टिन गुप्टिल आणि डॅरिल मिशेल यांच्याकडून चांगल्या सुरुवातीची अपेक्षा असेल, त्यानंतर कर्णधार केन विल्यमसन नेतृत्वाची धुरा सांभाळेल.