Swatantra Bhardwaj : जंतरमंतरवरील एका निदर्शनादरम्यान एका विद्यार्थी कार्यकर्त्याच्या वडिलांवर कथित मारहाण केल्याच्या आणि इतर आरोपांच्या संदर्भात, दिल्ली न्यायालयाने रविवारी हिंदुत्ववादी इन्फ्लुएंसर स्वतंत्र भारद्वाज (Swatantra Bhardwaj) यांना एका दिवसाची न्यायालयीन कोठडी सुनावली. भारद्वाज यांना व्हिडिओ-कॉन्फरन्सिंगद्वारे ड्युटी मॅजिस्ट्रेट अंजली सिंग यांच्यासमोर हजर करण्यात आले, ज्यांनी त्यांना न्यायालयीन कोठडीत पाठवले.

शनिवारी, भारद्वाज (Swatantra Bhardwaj) यांना अतिरिक्त सत्र न्यायाधीश सौरभ प्रताप सिंग लालर यांच्या निवासस्थानी हजर करण्यात आले होते; त्यावेळी न्यायाधीशांनी आरोपीच्या एका दिवसाच्या कोठडीतील चौकशीसाठी दिल्ली पोलिसांनी केलेली विनंती मान्य केली होती.

जंतरमंतर येथे काॅक्रोच जनता पार्टी अर्थात सीजेपीच्या नेतृत्वाखालील निदर्शनादरम्यान एका किशोरवयीन विद्यार्थी कार्यकर्त्याचे वडील संजय कुमार यांच्यावर झालेल्या कथित मारहाणीप्रकरणी, दिल्ली पोलिसांनी शुक्रवारी भारद्वाज यांच्याविरुद्धच्या एफआयआरमध्ये अत्याचार प्रतिबंधक कायदा आणि गुन्हेगारी स्वरूपाची धमकी या कलमांचा समावेश केला. त्यांच्यावर पोक्सो अंतर्गतही गुन्हा दाखल करण्यात आला आहे.

एका कथित मारहाणीच्या प्रकरणात अटक करण्याची मागणी करत सीजेपीने पार्लमेंट स्ट्रीट पोलीस स्टेशनबाहेर निदर्शने केल्यानंतर काही तासांतच, शुक्रवारी भारद्वाज यांना बुलंदशहरमध्ये ताब्यात घेण्यात आले होते. एका मुलाखतीवरून निर्माण झालेल्या संतापाच्या पार्श्वभूमीवर ही कारवाई करण्यात आली होती.

या मुलाखतीत भारद्वाज (Swatantra Bhardwaj) यांनी दावा केला होता की, २३ जून रोजी झालेल्या आंदोलनादरम्यान त्यांनी एका विद्यार्थी कार्यकर्त्याच्या वडिलांची कवटी फोडली’ होती आणि आपल्या राजकीय संबंधांमुळे ते अटकेतून वाचले होते.