नवी दिल्ली : पश्चिम बंगालमधील भाजपचे खासदार सौमित्र खान यांच्या एका वाक्याने एकच खळबळ उडाली आहे. खान यांनी  पंतप्रधान नरेंद्र मोदी यांची चक्क स्वामी विवेकानंद यांच्याशी तुलना केली आहे. या संदर्भात बोलताना खान यांनी ‘स्वामी विवेकानंद यांनी पंतप्रधान मोदी यांच्या रुपात पुनर्जन्म घेतला आहे’, असे म्हटले आहे. त्यांच्या या विधानामुळे नवा वाद निर्माण झाला असून तृणमूल काँग्रेस चांगलीच आक्रमक झाल्याचे पाहायला मिळत आहे.

सौमित्र खान हे पश्चिम बंगालमधील भाजपाचे खासदार आहेत. स्वामी विवेकानंद यांच्या जयंतीनिमित्त आयोजित केलेल्या एका कार्यक्रमात त्यांनी सहभाग नोंदवला. त्यानंतर खान यांनी माध्यमांशी संवाद साधला. यावेळी बोलताना “स्वामी विवेकानंद यांनी पंतप्रधान मोदी यांच्या रुपात पुनर्जन्म घेतला आहे. स्वामी आपल्यासाठी देवासमान आहेत. मोदी यांनी देशासाठी जीवन समर्पित केले आहे. ते आधुनिक भारताचे स्वामी विवेकानंद आहेत असे मला वाटते,” असे सौमित्र खान म्हणाले.

सौमित्र खान यांच्या या विधानानंतर तृणमूल काँग्रेसकडून संतप्त प्रतिक्रिया समोर येत आहे. कोलकात्याचे महापौर फिरहाद हकीम यांनी खान यांच्यावर सडकून टीका केली आहे. खान यांचे विधान म्हणजे स्वामी विवेकानंद यांचा अवमान आहे. स्वामी विवेकानंद यांची विचारधारा ही भाजपाच्या विचारसरणीच्या अगदी विरोधात आहे, असे हकीम म्हणाले.

दरम्यान, पंतप्रधान नरेंद्र मोदी यांची तुलना स्वामी विवेकानंद यांच्याशी करण्याचा हा पहिलाच प्रयत्न नाही. याआधी बिहार भाजपाचे प्रदेशाध्यक्ष नित्यानंद राय यांनीदेखील सौमित्र खान यांच्याप्रमाणेच विधान केले होते. पंतप्रधान नरेंद्र मोदी हे स्वामी विवेकानंद यांचे अवतार आहेत, असे नित्यानंद राय म्हणाले होते.