बीड : बॉलिवूड अभिनेत्री कंगना रणौत हिने काल खासदारकीची शपथ घेतली. शपथ घेतल्यानंतर तिने एक अजब मागणी केली. या मागणीनंतर महाराष्ट्राचे राजकारण चांगलेच तापले आहे. तिने थेट महाराष्ट्र सदनमधील मुख्यमंत्र्यांचा सूट राहण्यासाठी मागितला. तिच्या या मागणीवरून आता उबाठा गटाचे नेते आक्रमक झाले आहेत. काल खासदार संजय राऊत यांनी शेलक्या शब्दात कंगनावर टीका केली. तर आज उपनेत्या सुषमा अंधारे यांनी कंगनाच्या या मागणीवरून एकनाथ शिंदेंना टोला लगावला आहे.

काय म्हणाल्या सुषमा अंधारे?
मुख्यमंत्र्यांनी एवढा काही त्याग केलेला आहे की हिंदुत्वासाठी अहोरात्र झगडणार्‍या कंगना रणौत यांनाही मदत करतील. जर मुख्यमंत्री महोदयांचा सूट पाहिजे असेल तर शिंदेसाहेब गरज पडली तर त्यांच्या मुख्यमंत्रीपदाची खुर्चीसुद्धा मेहरबान करतील. त्यांनी त्यासाठी सुद्धा मागे हटू नये आणि हिंदुत्वासाठी त्यांनी ते केलं पाहिजे, अशी खोचक टीका शिवसेना उपनेत्या सुषमा अंधारे यांनी केली आहे.

कंगनाने काय केली मागणी?
कंगना हिमाचल प्रदेशातील मंडी मतदारसंघातून निवडून गेली आहे. खासदारकीची शपथ घेतल्यानंतर कंगना संध्याकाळच्या सुमारास महाराष्ट्र भवनात पोहोचली. तिनं राहण्यासाठी थेट मुख्यमंत्र्यांच्या सूटची मागणी केली. पण नियमानुसार हा सूट देऊ शकत नसल्याचं महाराष्ट्र सदनातील कर्मचाऱ्यांनी तिला सांगितलं.