Sushant Singh Rajput: बॉलिवूडमधील प्रतिभावान आणि लोकप्रिय अभिनेता सुशांत सिंह राजपूत यांच्या मृत्यूस आता पाच वर्षे झाली असली तरीही हा विषय आजही लोकांच्या मनातून गेला नाही. आता पुन्हा एकदा हा विषय चर्चेत आला आहे, कारण सुशांतची बहीण श्वेता सिंह कीर्ति हिने एका मुलाखतीत तिच्या भावाच्या मृत्यूबाबत धक्कादायक दावा केला आहे. श्वेताचा दावा – “हा आत्महत्येचा नव्हे, खुनाचा प्रकार आहे” एका मुलाखतीत श्वेताने सांगितले की, तिच्या भावाने आत्महत्या केली नव्हती, तर त्याचा खून करण्यात आला होता. तिने म्हटले की तिला ही माहिती दोन वेगवेगळ्या सायकिक्स (अध्यात्मिक शक्तीद्वारे माहिती देणाऱ्या व्यक्ती) यांनी दिली. ती म्हणाली, “एक सायकिक अमेरिकेतली होती आणि दुसरी मुंबईची. दोघींनी एकच गोष्ट सांगितली, सुशांतचा खून दोन लोकांनी केला.” या विधानानंतर पुन्हा सोशल मीडियावर मोठी चर्चा रंगली आणि सुशांतचे नाव पुन्हा ट्रेंड होऊ लागले. “आत्महत्या होणं शक्यच नव्हतं” श्वेताने सांगितले की, ज्या खोलीत सुशांत मृतावस्थेत आढळला, त्या ठिकाणी पंखा आणि पलंग यांच्यात इतकी उंचीच नव्हती की कोणी तिथे फास घेऊ शकेल. शिवाय घटनास्थळी कोणताही स्टूल किंवा इतर वस्तू सापडली नव्हती. तिच्या मते, सुशांतच्या मानेला ज्या खुणा होत्या त्या ओढणीच्या नव्हत्या, तर काहीतरी बारीक आणि कडक वस्तू, कदाचित साखळी सारख्या वाटत होत्या. “दोन लोक आले होते, खून करून गेले” श्वेताने सांगितले की, एका अमेरिकन सायकिक महिलेने तिच्याशी संपर्क साधला होता. ती महिला ध्यान आणि समाधी अवस्थेत जाऊन एखाद्या व्यक्तीच्या ऊर्जेतून माहिती मिळवते. श्वेताने सांगितले, “त्या महिलेला आमच्याबद्दल काही माहिती नव्हती, पण तिने स्पष्ट सांगितले की ‘दोन लोक आले आणि त्यांनी त्याचा अंत केला.’ काही दिवसांनी मुंबईतील दुसऱ्या सायकिकनेही अगदी हाच दावा केला, की दोन लोकांनी सुशांतचा जीव घेतला.” “ब्लॅक मॅजिक आणि प्लॅन केलेला माणूस” श्वेताने पुढे सांगितले की, सायकिक्सनी तिला हेही सांगितले की सुशांतच्या आयुष्यात एक व्यक्ती मुद्दामहून पाठवली गेली, जी त्याला मानसिकदृष्ट्या कमजोर करण्याचे काम करत होती. ती म्हणाली, “भाऊ खूप वेगाने प्रगती करत होता, पण काही लोकांना ते सहन झाले नाही. सायकिकच्या मते त्याच्यावर ब्लॅक मॅजिकसुद्धा केले गेले. आम्ही विज्ञानावर विश्वास ठेवणारे आहोत, पण आता सगळं नव्याने विचार करायला भाग पाडतंय.” रिया चक्रवर्तीच्या कवितेवर प्रश्नचिन्ह श्वेताने मुलाखतीत सुशांतची माजी मैत्रीण रिया चक्रवर्ती हिच्या जुन्या सोशल मीडिया पोस्टबद्दलही बोलली. रिया हिने एक कविता लिहिली होती – “You are soaring too high and your wings need to be cut.” श्वेता म्हणाली, “त्या ओळी अतिशय विचित्र आणि अस्वस्थ करणाऱ्या होत्या. त्या काळात रिया सुशांतच्या आयुष्यात होती, आणि सुशांतने ती पोस्ट लाईक केली होती. पण आता सगळ्या गोष्टींचा विचार केल्यावर ती कविता आणखी भयानक वाटते.” अद्यापही रहस्य कायम २०२० मध्ये सुशांतच्या मृत्यूने संपूर्ण देश हादरला होता. या प्रकरणाची चौकशी मुंबई पोलिस, ईडी, एनसीबी आणि सीबीआय यांनी केली, पण ठोस निष्कर्ष आजतागायत समोर आलेला नाही. आजही लाखो चाहत्यांना वाटते की ही आत्महत्या नव्हती. श्वेताच्या नव्या दाव्याने हे जुने जखम पुन्हा ताजे केले आहेत.
