पुणे – “खराडी, चंदननगर, वडगाव शेरी भागांत अहमदनगर जिल्हा व शिरूर तालुक्यातून शिक्षण, नोकरी व्यवसायानिमित्ताने हजारो नागरिक स्थायिक झाले आहेत. मात्र, बाहेरून आलेल्या आणि सामाजिक, राजकीय क्षेत्रात काम करणाऱ्या सर्वसामान्य कार्यकर्त्यांना स्थानिक पुढाऱ्यांच्या दडपशाही आणि दहशतीचा सामना करावा लागत आहे. त्यामुळे या भागातील दहशतीचे वातावरण बदलून स्वातंत्र्यात जगायचे असेल तर येथील जनतेने राष्ट्रवादी काँग्रेस – महायुतीचे उमेदवार सुनील टिंगरे यांना निवडून द्यावे,’ असे आवाहन आम्ही शिरूरकर मित्र परिवार फाउंडेशनचे अध्यक्ष बाळा पऱ्हाड यांनी केले आहे. वडगाव शेरी विधानसभा मतदारसंघाचे राष्ट्रवादी काँग्रेस महायुतीचे उमेदवार सुनील टिंगरे यांना “आम्ही शिरूरकर मित्र परिवार’ फाउंडेशनने जाहीर पाठिंबा दिला आहे. यावेळी त्यांनी माध्यमांशी संवाद साधला. पऱ्हाड म्हणाले, “आम्ही अनेक वर्षे स्थानिक नेतृत्वासोबत काम करूनही कधी साधे कौतुकही झाले नाही. मात्र २०१४ व २०१९ सालच्या विधानसभा निवडणुकीदरम्यान आमदार सुनील टिंगरे यांच्या विरोधात काम करूनही त्यांनी मनात आकस न ठेवता सामाजिक उपक्रमांमध्ये मदत केली. मी दुचाकीवरही कधी कुणाला सोबत ठेवत नाही. कारण त्यामुळे स्थानिकांकडून त्या कार्यकर्त्याला किंवा त्यांच्या कुटुंबीयांना त्रास होऊ शकतो, याची जाणीव मला आहे. त्यामुळे असे दहशतीचे वातावरण पुढील काळात बदलायचे असेल, सर्वसामान्य कार्यकर्त्यांवर अन्याय होऊ द्यायचा नसेल आणि स्वाभिमानाने आणि स्वातंत्र्याने जगायचे असेल तर वडगावशेरी, खराडी परिसरातील नागरिकांनी आमदार टिंगरे यांच्या पाठीशी उभे राहावे.’ भाजपचे पदाधिकारी सचिन सातपुते, शैलजित बनसोडे, अनिल नवले उपस्थितीत होते.
