Sunny Deol | ‘Jaat’ Box Office Collection – सनी देओलचा बहुचर्चित चित्रपट ‘जाट’ दि. 10 एप्रिल 2025 रोजी चित्रपटगृहांत प्रदर्शित झाला आहे. दक्षिण भारतीय दिग्दर्शक गोपीचंद मालिनेनी यांनी सनी देओलचा 90च्या दशकातील तोच दमदार अंदाज पुन्हा पडद्यावर साकारला आहे. ‘गदर 2’ नंतर सनी देओलने ‘जाट’मध्ये शत्रूंवर गर्जना करत आणि त्यांची जोरदार पिटाई करत जबरदस्त पुनरागमन केले आहे. रिलीजपूर्वी असा अंदाज होता की, ‘जाट’ हा या वर्षातील सर्वात मोठ्या ओपनिंग करणाऱ्या चित्रपटांमध्ये ‘छावा’, ‘सिकंदर’ आणि ‘स्काय फोर्स’ यांच्या यादीत सामील होऊ शकतो आणि चौथा मोठा ओपनर ठरू शकतो. पहिल्या दिवसाचे प्राथमिक आकडे समोर आले असून, हा चित्रपट तिकीट बारीवर चांगलाच हिट ठरला आहे. ‘जाट’ने पहिल्या दिवशी 9.50 कोटी रुपयांचा गल्ला जमवला आहे. हे सुरुवातीचे आकडे असल्याने यात पुढे आणखी थोडाफार बदल होऊ शकतो. ‘जाट’ने प्रदर्शित होताच अनेक रेकॉर्ड्स आपल्या नावे केले आहेत. हा सनी देओलच्या करिअरमधील सर्वाधिक कमाई करणारा दुसरा चित्रपट ठरला आहे. याआधी त्याच्या ‘गदर 2’ने 40.10 कोटी रुपयांचा गल्ला जमवला होता. याशिवाय ‘जाट’ने आणखी एक विक्रम रचला आहे. ‘छावा’, ‘सिकंदर’ आणि ‘स्काय फोर्स’नंतर हा 2025 मधला सर्वाधिक कमाई करणारा चौथा चित्रपट ठरला आहे. आगामी काळात देखील सिनेमाच्या कमाईत मोठी वाढ होण्याची शक्यता आहे. पहिल्या दिवशी सर्वाधिक कमाई करणारे चित्रपट : छावा- 33.10 कोटी रुपये, सिकंदर- 27.50 कोटी रुपये, स्काय फोर्स- 15.30 कोटी रुपये, जाट- 9.50 कोटी रुपये. तसेच ‘जाट’ या चित्रपटात सनी देओल आणि रणदीप हुड्डा यांच्यासोबतच विनीत कुमार सिंह, रेजिना कॅसेंड्रा, जगपती बाबू, सैयामी खेर आणि रम्या कृष्णन यांच्या महत्त्वपूर्ण भूमिका आहेत. मीडिया रिपोर्ट्सनुसार या चित्रपटाचं बजेट 100 कोटी रुपये आहे. या चित्रपटातील सनी देओलची कामगिरी, शिट्ट्या आणि टाळ्यांचा कडकडाट मिळवणारे संवाद आणि जबरदस्त ॲक्शन सीन्स या जमेच्या बाजू ठरत आहेत. सनी देओलच्या ‘गदर 2’ने देशभरात तब्बल 691 कोटी रुपयांची कमाई केली होती. त्यानंतर आता त्याचा ‘जाट’ कमाईचे कोणते नवीन विक्रम रचणार हे पाहणं महत्वाचं ठरणार आहे. कलाकारांना देखील सिनेमाकडून खूप अपेक्षा आहेत. ‘जाट’ कसा आहे? ‘गदर 2’ने 2023 मध्ये धमाल उडवल्यानंतर सनी देओल पुन्हा बॉक्स ऑफिसवर तुफान घडवत असल्याचे समीक्षकांचे मत आहे. बहुतेक समीक्षकांनी ‘जाट’ला ‘पूर्ण पैसा वसूल’ ठरवले आहे. 3.5 स्टार देत हा चित्रपट उत्तम मसाला एंटरटेनर असल्याचे माध्यमांनी म्हटले आहे.
