Summer Care: उन्हाळा सुरू झाला की उष्णतेचा त्रास वाढतोच, पण त्याचा परिणाम डोळ्यांवरही मोठ्या प्रमाणात होतो. प्रखर सूर्यप्रकाशामुळे डोळ्यांची जळजळ, डोळेदुखी, डोकेदुखी आणि अस्पष्ट दिसणे अशा तक्रारी वाढू लागतात. त्यामुळे या दिवसांत डोळ्यांची विशेष काळजी घेणे गरजेचे आहे. यासाठी गॉगल वापरणे हा एक सोपा आणि प्रभावी उपाय आहे. मात्र, फक्त फॅशन म्हणून नव्हे तर योग्य संरक्षणासाठी योग्य गॉगल निवडणे खूप महत्त्वाचे ठरते. Summer Care

उन्हाळ्यात शरीरात उष्णता वाढते, त्यामुळे भरपूर पाणी पिणे आवश्यक आहे. पाणी, सरबत, पन्हे यांसारखे द्रवपदार्थ घेत राहिल्यास शरीरातील कोरडेपणा कमी होतो आणि डोळेही कोरडे पडत नाहीत. बाहेर जाताना डोक्यावर टोपी, स्कार्फ किंवा छत्री वापरणेही उपयुक्त ठरते. बाहेरून आल्यावर पाय आणि चेहरा धुणे, तसेच डोळ्यांवर पाण्याचे शिंतोडे मारणेही डोळ्यांना आराम देते. Summer Care

गॉगल घेताना सर्वात आधी त्याची गुणवत्ता तपासणे गरजेचे आहे. गॉगल काचेचा आहे की प्लास्टिकचा, हे पाहावे. प्लास्टिक असल्यास त्याचा दर्जा चांगला आहे का, हे तपासणे महत्त्वाचे आहे. गॉगलमधून पाहताना वस्तूचा आकार बदलल्यासारखा वाटू नये किंवा हालचाल दिसू नये, याची खात्री करून घ्यावी.

गॉगल साधा घ्यायचा की पोलराइज्ड, हेही वापरावर अवलंबून असते. रोजच्या वापरासाठी साधा गॉगल पुरेसा असतो. पण प्रखर उन्हात, वाळवंटात किंवा लांब वेळ गाडी चालवताना पोलराइज्ड गॉगल अधिक उपयुक्त ठरतो. रंग निवडताना गडद राखाडी किंवा हिरवा रंग दिवसभरासाठी चांगला असतो, तर सकाळ-संध्याकाळसाठी फिकट रंग वापरता येतो. Summer Care

आजकाल फोटोक्रोमॅटिक गॉगलही उपलब्ध आहेत. हे गॉगल उन्हात गडद आणि सावलीत फिकट होतात. त्यामुळे सतत बाहेर फिरणाऱ्यांसाठी हे उपयुक्त ठरतात. मात्र, चारचाकी वाहनात वापरताना त्यांचा प्रभाव कमी होऊ शकतो, हे लक्षात ठेवावे. Summer Care

गॉगलची फ्रेमही आरामदायक असणे गरजेचे आहे. ती कानावर आणि नाकावर नीट बसली पाहिजे. धातूच्या फ्रेममध्ये त्वचेला त्रास होणार नाही, याची काळजी घ्यावी. प्लास्टिक फ्रेम घेताना ती योग्य बसते का, हे तपासावे, कारण त्यात नंतर बदल करणे कठीण असते.

दुचाकी चालवताना ‘रॅप राऊंड’ प्रकारचा गॉगल वापरणे अधिक सुरक्षित असते. यामुळे डोळ्यांना धूळ आणि वाऱ्यापासून संरक्षण मिळते. तसेच गॉगलची काच थोडी मोठी असावी, जेणेकरून जास्त संरक्षण मिळेल.

ज्यांना नंबरचा चष्मा आहे, त्यांच्यासाठीही आता विविध प्रकारचे गॉगल उपलब्ध आहेत. त्यामुळे स्टाइल आणि संरक्षण दोन्ही साधता येते.

एकंदरीत, गॉगल खरेदी करताना फक्त किंमत किंवा ब्रँड न पाहता त्याची गुणवत्ता, उपयोग आणि आराम यावर लक्ष दिल्यास उन्हाळ्यात डोळ्यांचे आरोग्य चांगले ठेवता येते.