Brunei  ।  पंतप्रधान नरेंद्र मोदी ब्रुनेईला गेले आहेत. पंतप्रधान मोदी यांचा ब्रुनेईला हा पहिलाच दौरा आहे. आजपर्यंत भारताच्या एकाही पंतप्रधानाने ब्रुनेईला भेट दिली नाही. येथील सुलतान हसनल बोलकिया यांनी पंतप्रधान मोदींना निमंत्रण दिले होते, त्यामुळेच मोदी तेथे गेले आहेत. इस्लामिक देश ब्रुनेईची लोकसंख्या ४ लाख असून येथील लोकांकडून करही घेतला जात नाही. अशात हा दौरा भारतासाठीही महत्त्वाचा आहे. या देशातील  राजा हसनल बोलकिया यांच्या बाबत काही खास दावे सध्या सोशल मीडियावर केले जात आहे तर जाणून घेऊया त्यांच्याबाबत…

सुलतान केस कापण्यासाठी 16 लाख रुपये खर्च करतात
द टाइम्स यूकेच्या रिपोर्टनुसार, येथील राजा हसनल बोलकिया हे केस कापण्यासाठी 16 लाख रुपये खर्च करतात. त्याचे केस कापणारे लोक महिन्यातून दोनदा खाजगी चार्टर्ड विमानाने येतात. यासाठी सुलतानने स्वतः हे विमान खरेदी केले, ज्याची किंमत तीन हजार कोटी रुपये आहे. यात सोन्याचे वॉश बेसिन आणि आलिशान सोन्याचा मुलामा असलेल्या खिडक्यांचाही समावेश आहे. विमानाच्या फरशीवर सोनेरी तारे असलेले हाताने बनवलेले कार्पेट पसरवले आहे. राजा झाल्यानंतरच  राजा हसनल बोलकिया यांनी 50 अब्ज रुपये किमतीचा महाल बांधला. हा राजवाडा इस्ताना नुरुल इमान या नावाने ओळखला जातो.

शिक्षण आणि आरोग्य सुविधा मोफत उपलब्ध
ब्रुनेईची अर्थव्यवस्था तेलावर आधारित आहे, १९२९ मध्ये येथे तेलाचा शोध लागला. तेल आणि नैसर्गिक वायू या देशाच्या अर्थव्यवस्थेचा कणा बनले आहे. जागतिक बँकेच्या मते, ब्रुनेईमध्ये दरडोई उत्पन्न सुमारे 28 लाख रुपये आहे, तर भारतात दरडोई उत्पन्न सुमारे 1 लाख 84 हजार रुपये आहे. येथे शिक्षण आणि आरोग्य सुविधा मोफत उपलब्ध आहेत. येथे वैयक्तिक उत्पन्नावर कोणताही कर नाही. हा नियम देशात राहणाऱ्या नागरिकांना आणि प्रवासींना लागू होतो.

 या करणामुळे पंतप्रधान मोदी ब्रुनेईला गेले
तज्ज्ञांचे म्हणणे आहे की, अलीकडेच भारताचे राष्ट्रपती व्हिएतनाम आणि मलेशियाला गेले होते. तर आता पंतप्रधान मोदी ब्रुनेई दौऱ्यावर आहेत, त्यानंतर ते सिंगापूरला जाणार आहेत. भारत आणि ब्रुनेई त्यांच्या राजनैतिक संबंधांना 40 वर्षे पूर्ण झाल्याचा वर्धापन दिन साजरा करतील असा निर्णय अलीकडेच घेण्यात आला. याच निमंत्रणावरून पंतप्रधान तेथे गेले आहे. असं असलं तरी संरक्षण, व्यापार, ऊर्जा आणि अवकाश तंत्रज्ञानासाठी ब्रुनेई खूप महत्त्वाचा आहे. ब्रुनेई हे अंतराळ तंत्रज्ञानात भारताचे भागीदार राहिले आहे. ब्रुनेईही भारताला तेल निर्यात करतो.