Suhana Khan : अमिताभ बच्चन यांचा केबीसी अर्थात कौन बनेगा करोडपती हा शो मागील अनेक वर्षांपासून प्रेक्षकांमध्ये चर्चेत राहिला आहे. या शोमध्ये अनेकांची स्वप्न पूर्ण झाली आहे. आतापर्यंत या कार्यक्रमात सामान्यांसोबतच अनेक सेलिब्रिटींनीही हजेरी लावली आहे. नुकतेच या शोमध्ये ‘द आर्चीज’ या सिनेमातील कलाकारांनी हजेरी लावली होती. तसेच बॉलीवूडचा किंग खान अर्थात शाहरुख खानची लेक सुहान खान सहभागी झाली होती. यावेळी सुहानाला शाहरुखविषयी एक प्रश्न विचारण्यात आला होता. मात्र तिला त्या प्रश्नाचे उत्तर देता आले नाही. केबीसीमध्ये शो सुरु असताना सुहानाला शाहरुखच्या करिअरशी निगडीत एक प्रश्न विचारण्यात आला. या प्रश्नाचं तिने चुकीचं उत्तर दिलं ज्यामुळे तिला सोशल मीडियावर ट्रोल करण्यात आले. अमिताभ बच्चन यांनी ‘खालील दिलेल्या पैकी कोणता पुरस्कार शाहरुखला मिळालेला नाही?’ असा प्रश्न सुहानाला विचारला. यासाठी A. पद्म श्री, B. लीजन ऑफ ऑनर आणि C. एल’एटोइल डी’ओर, D. वोल्पी कप असे चार पर्यायही तिला सुचवण्यात आले होते. याचे उत्तर D म्हणजेच वोल्पी कप हे आहे. परंतु सुहाना A म्हणजेच पद्धश्री या उत्तराची निवड करते आणि हे उत्तरं चुकतं. शाहरुखलावोल्पी कप हा पुरस्कार आतापर्यंत मिळालेला नाही. तिने चुकीचं उत्तर दिल्यानंतर दिग्दर्शिका झोया अख्तर, वेदांग आणि अमिताभ बच्चन थक्क होतात. सुहानाचं उत्तर चुकल्यानंतर बिग बी सुद्धा हैराण झाले. सध्या सुहानाचा व्हिडिओ सोशल मीडियावर तुफान व्हायरल होत असून नेटकऱ्यांनी तिच्यावर टीका केली आहे.
