Sugar Price In India : साखरेचे दर गेल्या महिनाभरात दुपटीने वाढल्याने ऐन सणासुदीच्या काळात सर्वसामान्यांना महागाईचा मोठा फटका बसत आहे. अशातच देशात साखरेचा कोणताही तुटवडा नसून किरकोळ बाजारातील साखरेचे वाढलेले दर लवकरच कमी होण्याची शक्यता आहे, असा दावा साखर उद्योगाची सर्वोच्च संघटना इंडियन शुगर अँड मिल्स असोसिएशनने (ISMA) सोमवारी केला आहे.

व्यापारी आणि मोठ्या ग्राहकांकडून झालेली सट्टेबाजीची खरेदी तसेच खराब हवामानामुळे उत्पादनात झालेली घट यामुळे साखरेच्या किमती वाढल्याचे ISMAचे अध्यक्ष नीरज शिरगावकर यांनी सांगितले.

पत्रकार परिषदेत बोलताना शिरगावकर यांनी साखर कारखान्यांकडून कृत्रिम टंचाई निर्माण करून कारखाना पातळीवरील (एक्स-मिल) दर वाढवण्यात आल्याचा आरोप स्पष्टपणे फेटाळून लावला.

सरकारने १० लाख टन कच्च्या साखरेच्या शुल्कमुक्त आयातीला परवानगी दिल्यानंतर साखरेचे दर कमी होण्यास सुरुवात झाली आहे. देशात साखरेचा तुटवडा नाही, असे शिरगावकर यांनी स्पष्ट केले.

Sugar prices : देशात मोठा साखर ‘घोटाळा’? राजू शेट्टींचे मोदींना पत्र; प्रत्येक जिल्ह्यातील गोडाऊन तपासण्याची मागणी 

सप्टेंबरअखेर देशातील साखरेचा शिल्लक साठा सुमारे ३५ लाख टन राहण्याचा अंदाज आहे. तसेच साखर कारखान्यांचे गाळप हंगामातील कामकाज सुमारे १५ ऑक्टोबरपासून सुरू होईल. ऑक्टोबरमध्ये १० ते १२ लाख टन साखरेचे उत्पादन होण्याची शक्यता आहे. त्याचवेळी ऑक्टोबर महिन्यातील साखरेची मागणी २४ ते २५ लाख टन राहण्याचा अंदाज ISMAने व्यक्त केला आहे.

महिनाभरात साखर 42 रुपयांवरून 80 रुपयांवर –

दरम्यान, साखरेचे भाव सातत्याने वाढत आहेत. गेल्या महिनाभरात 42 रुपये किलोने मिळणारी साखर आता थेट 80 रुपये किलोवर पोहोचली आहे. तसेच साखरेच्या भाववाढीवरून सोशल मीडियावर मीम्स देखील व्हायरल होत आहे.