लखनौ – उत्तर प्रदेशातील बस्ती येथून एक धक्कादायक घटना समोर आली आहे. येथे एक मजूर रातोरात कोट्यधीश झाला आहे. त्यांच्या खात्यात 2 अब्ज 21 कोटींहून अधिक रक्कम अचानक जमा झाली. बँक खात्यात एवढी रक्कम पाहून कामगाराचे डोळे चक्रावले. मात्र आता ही रक्कम त्यांच्यासाठी अडचणीचे ठरली आहे. आयकर विभागाची नोटीस त्यांच्या घरी पोहोचली आहे. जाणून घेऊया संपूर्ण प्रकरण काय आहे?

हे संपूर्ण प्रकरण बस्तीच्या लालगंज पोलीस स्टेशन हद्दीतील बटानिया गावचे आहे. प्राप्तिकर विभागाची नोटीस शिवप्रसाद निषाद यांच्या घरी पोहोचताच एकच खळबळ उडाली. शिवप्रसाद दिल्लीत दगड फोडण्याचे काम करतात. एका मजुराच्या घरी आयकर विभागाची नोटीस पोहोचल्याने कुटुंबाला धक्का बसला. कारण नोटीसमध्ये शिवप्रसाद यांच्या बँक खात्यातून 221 कोटी रुपयांचा व्यवहार दाखवण्यात आला आहे. याशिवाय 20 ऑक्टोबरपर्यंत सर्व कागदपत्रांसह हजर राहण्याचे आदेश दिले आहेत.

2019 मध्ये हरवले होते पॅन कार्ड –

आता हे समजत नाही की, शिवप्रसाद यांच्या खात्यात एवढे पैसे आले कसे. तो काम सोडून दिल्लीहून यूपीला परतला आहे. शिवप्रसाद यांनी 2019 मध्ये त्यांचे पॅनकार्ड हरवले होते. त्याच्या मदतीने कोणीतरी फसवणूक करून त्यांच्या नावावर बँक खाते उघडून हा घोटाळा केला असण्याची शक्यता आहे. या संदर्भात त्यांनी लालगंज पोलीस ठाण्यात जाऊन पोलिसांना पॅन कार्ड हरवल्याची आणि नोटीस प्रकरणाची माहिती दिली आहे.

खात्यात जमा झाले 2 अब्ज 21 कोटी 30 लाख रुपये –

शिवप्रसाद म्हणाले की, मी मजूर आहे. मी दगड फोडण्याचे काम करून पैसे कमावतो. एवढ्या पैशांचा व्यवहार कोणी केला हे मला माहीत नाही. कदाचित कोणीतरी माझ्या पॅन कार्डचा गैरवापर केला असेल. ज्या खात्यात 2 अब्ज 21 कोटी 30 लाख रुपये जमा झाले आहेत ते खाते माझ्या नावावर काढण्यात आले आहे. एवढा व्यवहार कसा आणि केव्हा झाला हे मला माहीत नाही. त्यांच्या दुसऱ्या खात्यांमध्ये पैशांचा कोणताही व्यवहार झालेला नाही.

पोस्टाने घरपोच मिळालेल्या नोटीसमध्ये बँक खात्यातून 2 अब्ज 21 कोटी 30 लाख रुपये रोख जमा झाल्याचा उल्लेख आहे. 4 लाख 58 हजार 715 रुपयांचा टीडीएस कापला जाईल, असेही नमूद केले आहे. कोट्यवधी रुपयांच्या व्यवहारांबाबत सध्या प्राप्तिकर आणि पोलिस विभाग सक्रिय झाले आहेत. दोन्ही विभागांनी आपापल्या स्तरावर तपास सुरू केला आहे.

या प्रकरणी पोलीस अधिकाऱ्याने सांगितले की, खात्यातील व्यवहारांची चौकशी करण्यात येत आहे. तपास अहवालाच्या आधारे पुढील कारवाई केली जाईल. बँक आणि आयकर विभाग संपर्कात आहेत.