Success Story: ‘इच्छाशक्ती प्रबळ असेल तर शारीरिक अक्षमता ध्येय गाठण्यापासून रोखू शकत नाही’, हे केरळच्या थान्या नाथन सी (Thanya Nathan C) यांनी सिद्ध करून दाखवले आहे. जन्मजात अंधत्व असूनही, थान्या यांनी केरळ न्यायिक सेवा परीक्षेत घवघवीत यश संपादन केले असून, त्या केरळच्या पहिल्या १००% दृष्टिहीन महिला जज बनल्या आहेत. त्यांच्या या यशाने संपूर्ण देशाचे लक्ष वेधून घेतले आहे. प्रतिकूल परिस्थितीवर मात – कन्नूर जिल्ह्यातील तालिपरम्बा येथील रहिवासी असलेल्या २४ वर्षीय थान्या यांनी लहानपणापासूनच अनेक आव्हानांचा सामना केला. सुरुवातीचे शिक्षण विशेष शाळेत झाल्यानंतर, त्यांनी १० वी आणि १२ वीचे शिक्षण सामान्य शाळेतून पूर्ण केले. त्यानंतर कन्नूर विद्यापीठातून एलएलबीची पदवी मिळवली. विशेष म्हणजे, संपूर्ण लॉ कॉलेजमध्ये त्या एकमेव दृष्टिहीन विद्यार्थिनी होत्या, तरीही त्यांनी अभ्यासात नेहमीच अव्वल स्थान टिकवून ठेवले. तंत्रज्ञानाची मिळाली साथ – डोळ्यांनी पाहता येत नसले तरी, आधुनिक तंत्रज्ञानाच्या मदतीने थान्या यांनी कायद्याचे ज्ञान आत्मसात केले. आपल्या यशाचे गमक सांगताना त्या म्हणतात, स्क्रीन-रीडर सॉफ्टवेअर याद्वारे त्यांनी कायदेशीर कागदपत्रे आणि पुस्तकांचे वाचन केले. महत्त्वाच्या कलमांचा आणि केस स्टडीचा अभ्यास करण्यासाठी त्यांनी ब्रेल लिपी आणि ऑडिओ नोट्स या माध्यमांचा वापर केला. त्यांनी काही काळ तालिपरम्बा येथे वकिलीची प्रॅक्टिस केली, ज्यामुळे त्यांना न्यायालयीन कामकाजाचा प्रत्यक्ष अनुभव मिळाला. इतिहासात नोंद – थान्या नाथन यांची ही कामगिरी ऐतिहासिक ठरली आहे. दिवाणी न्यायाधीश (Civil Judge) परीक्षेत त्यांनी दिव्यांग श्रेणीतून राज्यात प्रथम क्रमांक पटकावला आहे. थान्या या भारतातील दुसऱ्या १००% दृष्टिहीन न्यायाधीश ठरल्या आहेत. यापूर्वी २०१३ मध्ये राजस्थानचे ब्रह्मानंद शर्मा हे देशातील पहिले पूर्णतः दृष्टिहीन न्यायाधीश बनले होते. जागतिक स्तरावर, १९९१ मध्ये युनायटेड किंगडममध्ये सर जॉन अँथनी वॉल हे जगातील पहिले १००% अंध न्यायाधीश बनले होते. थान्या यांचा हा प्रवास केवळ केरळसाठीच नव्हे, तर देशभरातील लाखो दिव्यांग तरुणांसाठी प्रेरणादायी ठरला आहे. हेही वाचा: सुनेत्रा पवारांची मोदी-शहांशी भेट ते भारत-अमेरिका व्यापार करारात मोठे बदल… वाचा आजच्या टाॅप बातम्या
