Kolhapur : शाळांच्या स्वच्छतागृहांच्या सफाईसाठी ग्रामपंचायतींना पत्र द्यावे; शिक्षणाधिकारी यांना निवेदन
Kolhapur : बहिःस्थ अभ्यासक्रमासाठी पूर्वपरवानगी देताना संबंधित अभ्यासक्रमाची जाहिरात जोडण्याची अट घालण्यात येऊ नये. नवीन अभ्यासक्रमांचे प्रवेश साधारणतः जून-जुलै महिन्यात होत असल्याने मार्च महिन्यापासूनच जाहिरातीशिवाय पूर्वपरवानगीसाठी अर्ज स्वीकारून त्यांना मंजुरी देण्यात यावी. अशा विविध महत्त्वपूर्ण मागण्यांचा निवेदनात समावेश करण्यात आला आहे.

कोल्हापूर : शाळांच्या स्वच्छतागृहांची नियमित स्वच्छता होण्यासाठी ग्रामपंचायतींनी मानधन तत्त्वावर सफाई कामगारांची नियुक्ती करावी, याबाबत सर्व ग्रामपंचायतींना पत्र देण्यात यावे किंवा शाळांच्या स्वच्छतागृहांच्या सफाईचे काम स्वतंत्र यंत्रणेकडे सोपविण्यात यावे, अशी मागणी महाराष्ट्र पुरोगामी प्राथमिक शिक्षक संघटनेने जिल्हा परिषदेच्या मुख्य कार्यकारी अधिकारी जॅसमिन मॅडम व प्राथमिक शिक्षणाधिकारी अशोक घुगे साहेब यांच्याकडे निवेदनाद्वारे करण्यात आली.
संघटनेने दिलेल्या निवेदनामध्ये शिक्षक व शिक्षण क्षेत्राशी संबंधित विविध प्रलंबित प्रश्न आणि मागण्या मांडण्यात आल्या आहेत.
1. निवडश्रेणी व वरिष्ठ श्रेणीचे प्रलंबित प्रस्ताव तातडीने मंजूर करण्यात यावेत.
2. मुंबई उच्च न्यायालयाच्या मा. लार्जर बेंचचा न्यायनिर्णय होताच, त्यानुसार शिक्षण विस्तार अधिकारी वर्ग-३ श्रेणी-२, वर्ग-३ श्रेणी-३, केंद्रप्रमुख व मुख्याध्यापक या पदांच्या पदोन्नती प्रक्रिया तातडीने पूर्ण करण्यात याव्यात.
3. सदर पदोन्नती प्रक्रिया पूर्ण होताच विषयवार शिक्षकांचे समायोजन करून रिक्त असलेल्या सर्व पदांवर विषयवार पदोन्नती प्रक्रिया राबविण्यात यावी.
4. शासनाच्या धोरणानुसार जिल्हा परिषद स्वनिधीतून शिष्यवृत्ती परीक्षेची फी भरण्यात यावी.
5. भविष्य निर्वाह निधीचे (PF) मोबाईल ॲप सुरळीतपणे कार्यान्वित करण्यात यावे.
6. तालुकानिहाय सेवापुस्तक पूर्तता शिबिरांचे आयोजन करून सर्व आवश्यक नोंदी पूर्ण करण्यात याव्यात.
7. क्रीडा स्पर्धा व सांस्कृतिक स्पर्धांच्या वेळी वाहतुकीसाठी खासगी वाहनांशिवाय पर्याय उपलब्ध होत नाही. त्यामुळे संबंधित शाळांना पालकांच्या संमतीने खासगी वाहनातून विद्यार्थ्यांचा प्रवास करण्यास परवानगी देण्यात यावी.
8. मागणीनुसार विषय शिक्षकांचे रिव्हर्शन व कन्व्हर्जन करण्यात यावे.
9. केवळ शनिवारीच ऑनलाइन व इतर कामांची माहिती संकलित करण्याबाबतच्या शासन परिपत्रकाची प्रभावी अंमलबजावणी करण्यात यावी.
10. शिष्यवृत्ती वर्ग असलेल्या शिक्षकांना जनगणनेच्या कामातून वगळण्यात यावे. तसेच जनगणनेचे काम पूर्ण झाल्यानंतर अंकुर व प्रज्ञाशोध परीक्षांचे नियोजन करण्यात यावे.
11. ISRO सहलीसाठी निवड झालेल्या विद्यार्थ्यांच्या सहलीचे आयोजन तातडीने करण्यात यावे.
12. नवनियुक्त शिक्षकांचे शालार्थ आयडी लवकरात लवकर जनरेट करण्यात यावेत.
13. बहिःस्थ अभ्यासक्रमासाठी पूर्वपरवानगी देताना संबंधित अभ्यासक्रमाची जाहिरात जोडण्याची अट घालण्यात येऊ नये. नवीन अभ्यासक्रमांचे प्रवेश साधारणतः जून-जुलै महिन्यात होत असल्याने मार्च महिन्यापासूनच जाहिरातीशिवाय पूर्वपरवानगीसाठी अर्ज स्वीकारून त्यांना मंजुरी देण्यात यावी.
अशा विविध महत्त्वपूर्ण मागण्यांचा निवेदनात समावेश करण्यात आला आहे.
यावेळी उपस्थित शिष्टमंडळात संघटनेचे राज्याध्यक्ष प्रसाद पाटील, जिल्हा नेते शंकर पवार, जिल्हाध्यक्ष एस. के. पाटील, जिल्हा सरचिटणीस सुनील पोवार, जिल्हा कार्याध्यक्ष श्रीकांत टिपूगडे, प्रसिद्धिप्रमुख अशोक खाडे, संघटक तुषार कुंभार, करवीर कोषाध्यक्ष महेश कोरवी, करवीर उपाध्यक्ष प्रभाकर बुचडे आदी पदाधिकारी उपस्थित होते.





