सावित्रीबाई फुले पुणे विद्यापीठात विद्यार्थी संघटनांचे आंदोलन
Student organizations: सावित्रीबाई फुले पुणे विद्यापीठ प्रशासनाने कॅम्पसमध्ये आंदोलनांवर घातलेल्या वादग्रस्त निर्बंधाविरोधात विविध विद्यार्थी संघटना आक्रमक झाल्या आहेत.

सोमवारी विद्यापीठाच्या मुख्य इमारतीसमोर जोरदार निदर्शने करत विद्यार्थ्यांच्या मूलभूत अधिकारांवर गदा आणणाऱ्या प्रशासनाचा तीव्र निषेध करून संविधानाने दिलेल्या अभिव्यक्ती स्वातंत्र्याचा संकोच सहन केला जाणार नाही, असा इशारा विद्यार्थ्यांनी दिला.

सकाळी अकरा वाजता काही संघटनांनी मुख्य इमारतीसमोर आंदोलन सुरू केले, तर दुपारी चार वाजता जयकर ग्रंथालयापासून मुख्य इमारतीपर्यंत मोर्चा काढण्यात आला. सुरक्षा रक्षकांचे बॅरिकेड्स ओलांडत संतप्त विद्यार्थ्यांनी कुलगुरूंच्या कार्यालयासमोर ठिय्या आंदोलन केले.

दरम्‍यान, विद्यापीठ हे कोणाच्या मालकीची जहागिरी नसून, ज्ञानपीठ आहे. सावित्रीबाई फुलेंनी अन्यायाविरुद्ध लढण्याची शिकवण दिली. मात्र, आज त्याच विद्यापीठात विद्यार्थ्यांच्या अधिकारांची गळचेपी केली जात आहे, अशी संतप्‍त भावना आंदोलकांनी व्‍यक्‍त केली.

विद्यापीठाच्या जागेवर आंदोलन करण्याचा अधिकार भारतीय संविधानाने प्रत्येक नागरिकाला दिला असल्याने व्यवस्थापन परिषदेला हे अधिकार डावलण्याचा कोणताही अधिकार नाही, असेही स्पष्ट करण्यात आले.

 परिपत्रकावर पुनर्विचार करू
विद्यार्थ्यांच्या अभिव्यक्ती स्वातंत्र्यावर निर्बंध आणण्याचा आमचा कोणताही हेतू नाही. मात्र, बाहेरील संघटनांच्या आंदोलनांमुळे शैक्षणिक वातावरण अस्थिर होऊ नये, हा यामागचा उद्देश होता. या वादावर तोडगा काढण्यासाठी आगामी ४ नोव्हेंबर रोजी होणाऱ्या व्यवस्थापन परिषदेच्या बैठकीत या परिपत्रकावर पुनर्विचार करून प्रस्ताव सादर केला जाईल, अशी ग्वाही पुणे विद्यापीठ प्रशासनाकडून देण्यात आली.

आंदोलनात सहभागी विद्यार्थी संघटना
आंदोलन स्‍टुडंट फेडरेशन ऑफ इंडिया, सम्यक विद्यार्थी आंदोलन, विद्यापीठ विद्यार्थी संघर्ष कृती समिती विद्यापीठ युनिट, रिपब्लिकन विद्यार्थी सेना, सत्यशोधक विद्यार्थी आघाडी, पीएचडी रीसर्च स्कॉलर असोसिएशन, कॉकरोच जनता पार्टी, शेतकरी क्रांतिकारी संघटना, विश्वरत्न डॉ. बाबासाहेब आंबेडकर विद्यार्थी हक्क समिती, वंचित बहुजन युवा आघाडी व सत्यशोधक बहुजन आघाडी.