Student Attack – जुन्नर तालुका मधील वडगाव आनंद येथील रेवबाई बालाजी देवकर विद्यालय या शासन अनुदानित शाळेत बुधवारी (दि. 25) दुपारी सुमारे अडीच वाजण्याच्या सुमारास शाळेच्या आवारात दोन अल्पवयीन विद्यार्थ्यांवर धारदार शस्त्राने हल्ला झाल्याची धक्कादायक घटना घडली. विशेष म्हणजे हल्ला करणारेही नववीतील दोन अल्पवयीन विद्यार्थीच असल्याने परिसरात मोठी खळबळ उडाली आहे. आठवीत शिकणारे दोन विद्यार्थी शाळेतील नववीच्या विद्यार्थ्यांमधील भांडण सोडविण्यासाठी मधल्या सुटीदरम्यान शौचालयाजवळ गेले होते. त्यावेळी वाद चिघळत जाऊन नववीतील विद्यार्थ्यांनी धारदार शस्त्राने दोघांवर वार केले. अचानक झालेल्या या हल्ल्यामुळे शाळा परिसरात भीतीचे वातावरण निर्माण झाले. घटनेनंतर शिक्षकांनी तातडीने जखमी विद्यार्थ्यांना आळेफाटा येथील एका खासगी रुग्णालयात दाखल केले. डॉक्टरांनी दिलेल्या माहितीनुसार, जखमींपैकी एका विद्यार्थ्याच्या श्वसननलिकेला गंभीर दुखापत झाली असून त्याची प्रकृती चिंताजनक आहे. स्वरनलिका कायमस्वरूपी खराब होण्याची भीती वैद्यकीय तज्ज्ञांनी व्यक्त केली आहे. या प्रकरणी जखमी विद्यार्थ्यांपैकी एकाच्या मामांनी आळेफाटा पोलिस ठाणे येथे उशिरा फिर्याद दाखल केली. पोलिसांनी गुन्हा रजिस्टर क्रमांक 61 अंतर्गत दोन अल्पवयीन विद्यार्थ्यांविरुद्ध गुन्हा दाखल केला आहे. पोलीस निरीक्षक विश्वास जाधव यांनी सांगितले की, दोन अल्पवयीन मुलांना मारहाण करणार्या दुसर्या अल्पवयीन मुलावर गुन्हा दाखल करण्यात आला असून पुढील तपास सुरू आहे. दरम्यान, या शाळेत एकूण 432 विद्यार्थी-विद्यार्थिनी शिक्षण घेत आहेत. घटनेनंतर संतप्त पालकांनी शाळेत धाव घेत आपल्या मुलांच्या सुरक्षेबाबत संस्थेकडे जाब विचारला. संस्था अध्यक्ष उल्हास विठ्ठल देवकर यांनी प्रतिक्रिया देताना सांगितले, घडलेला प्रकार अत्यंत निंदनीय असून यापुढे शाळेच्या आवारात असे अनुचित प्रकार होणार नाहीत, यासाठी संस्थास्तरावर आवश्यक ती काळजी घेतली जाईल; मात्र शाळेच्या प्रभारी मुख्याध्यापिका मंगला अंकुश घाडगे यांनी या घटनेविषयी अधिक माहिती देण्यास नकार दिला.
