पिंपरी : शहरी भागातील शाळांच्या धर्तीवर जोरदार तयारी
गावातही डिजिटल शिक्षणाचे वारे
पवनानगर – करोनाचा प्रादुर्भाव रोखण्यासाठी शाळा बंद असून, नवीन शैक्षणिक वर्षाचा “श्रीगणेशा’ जुलै-ऑगस्ट महिन्यात होईल; परंतु सध्या तरी शहरी व काही ग्रामीण भागातील शाळांनी 15 जूनपासून ऑनलाइन शिक्षणाला “मुहूर्त’ मिळाला आहे. शिक्षण संस्थांकडून विद्यार्थ्यांना ऑनलाइन शिक्षण मिळण्यास सुरवात झाली आहे. लोणावळा, तळेगाव, वडगाव, कामशेत या शहरी, तर मावळ तालुक्यातील पवनानगर, कार्ला, कान्हे, इंदोरी, भाजे येथील काही ग्रामीण भागातील शाळांनी देखील कात टाकत “ऑनलाइन अभ्यासाची “पेरणी’ केली आहे.
शहर भागातील काही शाळांनी आपल्या स्वत:चे नवे ऍप तयार केले आहे. विकसित केलेल्या स्वत:च्या ऍपद्वारे ऑनलाइन अभ्यास घेतला जात आहे. तर काही शाळांनी व्हिडिओ अथवा पाठातील मुद्द्यांचे मॅसेज तथा ऑडिओ तयार करून ग्रुपवर पाठवून अभ्यास घेत आहेत. विद्यार्थांना अभ्यास करून त्यांची छायाचित्र पाठविण्यास सांगण्यात येत आहेत.
वर्गवार व्हॉटस्अप ग्रुप करुन नियुक्त केलेल्या वर्गशिक्षकांमार्फत त्याची नोंद ठेवण्यात येत आहे. या ऑनलाइन अभ्यासामुळे विद्यार्थी हा शिक्षणाच्या प्रवाहात राहून अभ्यासात सातत्य ठेवण्याचा उद्देश देखील शाळांचा आहे. शहरी भागात या ऑनलाइन शिक्षणाला उत्स्फूर्त प्रतिसाद मिळत असला तरी ग्रामीण भागात अनेक तांत्रिक अडचणींचा सामना करावा लागत आहे. या अडथळ्यांमुळे पाल्य आणि पालक दोघेही मेटाकुटीला आले आहेत. याशिवाय बहुतेक पालक कामानिमित्त बाहेर जातात. काही वाड्या-वस्त्यांवर वीज गेली, तर कुठे मोबाइल रेंजची समस्या देखील निर्माण होत आहे. त्यामुळे शहरी भागाच्या तुलनेत ग्रामीण भागात ऑनलाइन शिक्षणाला पाठ गिरविणे कठिण झाले आहे.
आमच्या संस्थेने लॉकडाऊन झाल्यापासून ऑनलाइन वर्ग सुरू केले. या वर्गांना शहरी भागात उत्स्फूर्त प्रतिसाद मिळतो. परंतु ग्रामीण भागात थंड प्रतिसाद आहे. या ऑनलाइन शिक्षणाचा फायदा शाळा नेहमीप्रमाणे सुरू झाल्यानंतर विद्यार्थ्यांना होऊ शकतो.
– संतोष खांडगे, सचिव, नूतन महाराष्ट्र विद्या प्रसारक मंडळ.
ऑनलाइन शिक्षण हा पर्याय चागंला आहे. यामुळे विद्यार्थी शिक्षण प्रवाहात राहू शकतात; परंतु ग्रामीण भागामध्ये चक्री वादळामुळे परिसरात विजेचे खांब पडल्यामुळे काही भागात वीज नाही. बहुतेक ठिकाणी रेंज नसल्यामुळे तेथील पालकांना व विद्यार्थ्यांना अडचणी येत आहेत. ग्रामीण भागात काही पालकांकडे स्मार्ट फोन नसल्यामुळे काही विद्यार्थ्यांना इच्छा असूनही ऑनलाइन अभ्यास वर्गात सहभागी होता येत नाही. आम्ही अधिकाधिक विद्यार्थ्यांना ऑनलाइन शिक्षण कसे देता येईल याचा प्रयत्न शाळेकडून सुरू आहे.
– पांडुरंग ठाकर, मुख्याध्यापक, पवना संकुल.
ऑनलाइन शिक्षण हा सुद्धा शाळा सुरू होईपर्यंत योग्य पर्याय आहे. ऑनलाइन शिक्षणाचा फायदा होत आहे; त्यामुळे मुले अभ्यास करण्यास लागली आहेत. परंतु सगळ्यांकडे स्मार्ट फोन असेलच असे नाही. काही वेळा रेंज सुद्धा कमी असते तरी मुले अभ्यास करीत आहेत.
– ज्ञानेश्वर गोणते, पालक.
