पौड : मुळशी तहसील कार्यालय पौड आवारात महसूल कर्मचारी, पोलीस कर्मचारी तसेच नागरिकांकडून बिनधास्तपणे खाजगी वाहने लावली जात असल्याने नागरिकांना मोठ्या प्रमाणात अडचणींना सामोरे जावे लागत होते. तहसील कार्यालयात प्रवेश करताना ‘नो पार्किंग’चा फलक लावण्यात आलेला असूनही नियमांचे सर्रास उल्लंघन होत होते. खासदार, आमदार, विधान परिषदेचे सदस्य तसेच वरिष्ठ अधिकाऱ्यांची अधिकृत वाहने वगळता अन्य कोणतेही वाहन परवानगीशिवाय आवारात सोडले जाणार नाही, असे स्पष्ट निर्देश असतानाही दररोज मोठ्या प्रमाणात वाहने उभी केली जात होती. यामुळे तहसील कार्यालयात येणाऱ्या नागरिकांना चालणे अवघड होत होते. विशेषतः नागरिक सुविधा केंद्राच्या दरवाजासमोर वाहनांची पार्किंग होत असल्याने ये-जा करणाऱ्यांना मोठा त्रास सहन करावा लागत होता. या परिस्थितीची माहिती मिळाल्यानंतर मुळशीचे तहसीलदार विजयकुमार चोबे यांनी तातडीने कारवाई करत आजपासून तहसील कार्यालयाबाहेर बॅरिकेट्स बसविण्याचे आदेश दिले. त्याचबरोबर प्रवेशद्वारावर एक होमगार्ड कर्मचारी नियुक्त करण्यात आला आहे. नागरिकांचा दिलासा तहसील कार्यालयात आजपासून कोणतेही खाजगी वाहन प्रवेश न केल्याने संपूर्ण आवार मोकळा झाला आहे. यामुळे नागरिक तसेच वकिलांची ये-जा सुलभ झाली असून, कार्यालयाने अक्षरशः मोकळा श्वास घेतल्याचे चित्र दिसून आले. निर्णयाचे स्वागत तहसील कार्यालयाबाहेर उभारलेले बॅरिकेट आणि नियुक्त होमगार्ड यांच्या देखरेखीमुळे कार्यालयाच्या आत एकही वाहन दिसून आले नाही.- यांच्या या निर्णयाचे नागरिक व वकिलांनी स्वागत केले आहे.
