सांगलीः केंद्रीय मंत्री आणि भाजपचे जेष्ठ नेते नितीन गडकरी आणि राष्ट्रवादी काँग्रेस शरदचंद्र पवार पक्षाचे प्रदेशाध्यक्ष जयंत पाटील एका कार्यक्रमाच्या निमित्ताने एकत्र एका व्यासपीठावर आले होते. हे दोन्ही नेते त्यांच्या आक्रमक बोलण्यापेक्षा संयमी बोलण्यासाठी प्रसिद्ध आहेत. इस्लमापूरमधील राजारामबापू इन्स्टिट्यूटच्या एका कार्यक्रमासाठी हे दोन्ही जेष्ठ नेते एकाच व्यासपीठावर आल्याने अनेकांच्या भुवय्या उंचावल्या.

यामुळे जयंत पाटील हे भाजपमध्ये प्रवेश करणार असल्याचा चर्चांना उधाण प्राप्त झाले होते. या चर्चेला पाटील यांनी मोठ्या खुमाकदार पद्धतीने उत्तर दिले आहे. भाषणावेळी आता गडकरी साहेब राष्ट्रवादीत प्रवेश करणार, अशा बातम्या करू नका असे म्हणत पत्रकारांना जयंत पाटील यांनी टोला लगावला आहे. त्यांच्या या वाक्यावर सभागृहामध्ये उपस्थित असणाऱ्यांमध्ये एकच हशा पिकला.

केंद्रीय मंत्री नितीन गडकरी यांच्या हस्ते सोमवारी सांगली जिल्ह्यातील इस्लामपूर येथील राष्ट्रवादी काँग्रेसचे (शरद पवार) प्रदेशाध्यक्ष जयंत पाटील यांच्या राजारामबापू इन्स्टिट्यूट ऑफ टेक्नॉलॉजी येथे आंतरराष्ट्रीय विद्यार्थ्यांसाठी वसतिगृह आणि व्यायामशाळेचे उद्घाटन करण्यात आले. गडकरी साहेबांना सहा वाजून दहा मिनिटांनी निघायचे आहे. त्यामुळे मी फार मोठे भाषण करणार नाही. गडकरी साहेबांनी आमच्या प्रगतीशील संस्थेला भेट देत चांगला प्रतिसाद दिला. आमच्या पत्रकारांना एकच विनंती आहे की, आता गडकरी साहेब राष्ट्रवादीत जाणार अशा बातम्या करू नका, असा टोला जयंत पाटील यांनी यावेळी बोलताना पत्रकारांना लगावला.

…अशी धारणा पत्रकारांची झाली आहे

तुम्ही कशाची बातमी करता त्यावर पत्रकारितेचा दर्जा ठरतो. पत्रकारांनी एक बातमी केली आणि त्याच्यावरून देशभरातील मोठमोठ्या चिंतन करणारी लोकं पण बातम्या तयार करायला लागली, याचे मला शल्य वाटत असल्याची भावना यावेळी पाटील यांनी व्यक्त केली. आज गडकरी साहेब आले आहेत. दोन वेगवेगळ्या पक्षांची माणसं एकत्र येऊच शकत नाही अशी धारणा ज्या पत्रकारांची झाली आहे, त्याबद्दल न बोललेलेच बरे, असे जयंत पाटील यावेळी बोलताना म्हणाले.

‘ते’ दावे फेटाळले.

विधानसभा निवडणुकीच्या दरम्यान आणि आत्ताही राष्ट्रवादी शरदचंद्र पवार पक्षाचे प्रदेशाध्यक्ष जयंत पाटील हे अजित पवार यांच्या राष्ट्रवादीमध्ये प्रवेश करणार असल्याच्या बातम्या माध्यमांमध्ये येत असतात. त्यांच्यासाठी राष्ट्रवादी अजित पवार यांच्या पक्षाने मंत्रीपद ठेवले असल्याचे देखील बोलले जात आहेत. अशातच जयंत पाटील यांनी हे सर्व दावे फेटाळून लावले आहेत. यामुळे त्यांच्या राष्ट्रवादी अजित पवार पक्षाच्या पक्ष प्रवेशाच्या बातम्यांना पूर्णविराम खुद्द पाटील यांनीच जाहीर भाषणात दिला आहे.