Stock Market : दिल्ली सरकारने जाहीर केलेल्या महत्त्वाकांक्षी इलेक्ट्रिक वाहन धोरणाच्या पार्श्वभूमीवर, इलेक्ट्रिक दुचाकी उत्पादक ओला इलेक्ट्रिक मोबिलिटी आणि एथर एनर्जीच्या शेअर्समध्ये मंगळवारी शेअर बाजारात तेजी दिसून आली.

ओला इलेक्ट्रिक मोबिलिटीचा शेअर बीएसईवर 8.34 टक्क्यांनी वधारून 43.79 रुपयांवर बंद झाला. दिवसभरात तो 11.20 टक्क्यांनी वाढून 44.95 रुपयांवर पोहोचला होता.

एथर एनर्जीचा शेअर 5.39 टक्क्यांनी वाढून 1,140.85 रुपयांवर पोहोचला. दिवसभरात, हा शेअर 5.95 टक्क्यांनी वाढून 1,147 रुपयांवर पोहोचला, जो त्याचा 52 आठवड्यांचा उच्चांक आहे.

दिल्ली सरकारच्या धोरणाअंतर्गत 30 लाख रुपयांपर्यंतच्या किमतीच्या ईव्ही (इलेक्ट्रिक वाहने) साठी नोंदणी शुल्क आणि रस्ते कर रद्द करण्यात आला आहे, तसेच जुनी वाहने भंगारात काढून नवीन ईव्ही खरेदी करणार्‍यांना 1 लाख रुपयांचे प्रोत्साहन दिले जाईल.या नवीन धोरणांतर्गत, ई-दुचाकी खरेदी करणार्‍यांना पहिल्या वर्षी 30,000 रुपये, दुसर्‍या वर्षी 20,000 रुपये आणि तिसर्‍या वर्षी 10,000 रुपयांचे अनुदान मिळेल.

1 जानेवारी 2027 पासून दिल्लीत केवळ इलेक्ट्रिक ऑटोरिक्षांची नोंदणी केली जाईल, तर नवीन पेट्रोल आणि सीएनजी दुचाकींची नोंदणी टप्प्याटप्प्याने बंद केली जाईल आणि 1 एप्रिल 2028 पासून केवळ इलेक्ट्रिक दुचाकींची नोंदणी केली जाईल.

या घडामोडीवर प्रतिक्रिया देताना, एथर एनर्जीचे सह-संस्थापक आणि सीईओ तरुण मेहता यांनी ’एक्स’वरील एका पोस्टमध्ये म्हटले आहे की, दिल्लीचे ईव्ही धोरण हे भारतातील विद्युतीकरणासाठी शहर पातळीवरील सर्वात महत्त्वपूर्ण प्रयत्नांपैकी एक आहे. ज्या पद्धतीने धोरण तयार केले आहे, तेही लक्षवेधी आहे.

प्रोत्साहन, टप्प्याटप्प्याने विद्युतीकरणाचे आदेश आणि चार्जिंग पायाभूत सुविधा यांच्या संयोगाने एक अतिशय मजबूत पाया तयार होतो, असे त्यांनी नमूद केले.
अधिक महत्त्वाचे म्हणजे, मेहता म्हणाले, जर दिल्ली बहुतांश ईव्ही वापरणारे शहर बनू शकले, तर त्याला उर्वरित देशासाठी एक आदर्श बनण्याची संधी आहे.

मुख्य निर्देशांकांत घट –

दरम्यान मुंबई शेअर बाजारचा सेन्सेक्स 249.70 अंकांनी, म्हणजेच 0.33 टक्क्यांनी घसरून 76,478.67 अंकांवर स्थिरावला. राष्ट्रीय शेअर बाजाराचा निफ्टी 80.50 अंकांनी घसरून 23,865.75 अंकांवर बंद झाला.

नैऋत्य मान्सूनच्या आगमनास झालेला विलंब, नवीन परदेशी निधीचा बहिर्वाह आणि ब्लू-चिप आयटी स्टॉक्समधील घसरण यांमुळे विक्री झाली. परदेशी संस्थात्मक गुंतवणूकदारांनी सोमवारी 1,350.10 कोटी रुपयांच्या इक्विटीची विक्री केली. ब्रेंट क्रूडच्या दरात 0.37 टक्क्यांनी वाढ होऊन तो प्रति बॅरल 72. 88 अमेरिकन डॉलरवर पोहोचला.