Share Market News | अमेरिकेचे राष्ट्राध्यक्ष डोनाल्ड ट्रम्प यांनी टॅरिफची घोषणा केल्यापासून शेअर बाजारात प्रचंड घसरण पाहायला मिळत आहे. अनेक भारतीय कंपन्यांना याचा मोठा फटका बसला आहे. मागील एका आठवड्यात सेन्सेक्समधील (Sensex) टॉप 10 पैकी 9 कंपन्यांच्या बाजार भांडवलात 2,94,170.16 कोटी रुपयांची मोठी घट झाली आहे. म्हणजेच, गुंतवणूकदारांना तब्बल 2,94,170.16 कोटी रुपयांचा फटका बसला आहे.

यामध्ये टाटा कन्सल्टन्सी सर्व्हिसेस (टीसीएस) ला सर्वाधिक नुकसान झाले. गेल्या आठवड्यात, बीएसईचा (BSE) 30 शेअर्सचा सेन्सेक्स 2,050.23 अंकांनी म्हणजेच 2.64 टक्क्यांनी खाली आला, तर नॅशनल स्टॉक एक्सचेंजच्या (NSE) निफ्टीमध्ये (Nifty) 614.8 अंकांची किंवा 2.61 टक्क्यांची घट झाली.

सेन्सेक्समधील या कंपन्यांमध्ये मोठी घसरण

सेन्सेक्सच्या पहिल्या 10 कंपन्यांमध्ये टाटा कन्सल्टन्सी सर्व्हिसेस, रिलायन्स इंडस्ट्रीज, इन्फोसिस, बजाज फायनान्स, आयसीआयसीआय बँक, एचडीएफसी बँक, हिंदुस्तान युनिलिव्हर लिमिटेड, भारतीय स्टेट बँक आणि आयटीसी यांच्या बाजार मूल्यांकनात घट झाली. केवळ भारती एअरटेलच्या बाजार भांडवलात काहीशी वाढ दिसून आली.

मागील आठवड्यात टीसीएसचे मार्केट कॅप 1,10,351.67 कोटी रुपयांनी घटून 11,93,769.89 कोटी रुपये आले. रिलायन्स इंडस्ट्रीजचे मार्केट कॅप 95,132.58 कोटी रुपयांनी कमी होऊन 16,30,244.96 कोटी रुपयांवर आणि इन्फोसिसचे 49,050.04 कोटी रुपयांच्या नुकसानीसह 6,03,178.45 कोटी रुपयांवर आले. तसेच, केवळ भारती एअरटेलचे मार्केट कॅप 7,013.59 कोटी रुपयांनी वाढून 9,94,019.51 कोटी रुपयांवर पोहोचले.

पहिल्या 10 कंपन्यांच्या यादीत रिलायन्स इंडस्ट्रीज पहिल्या स्थानावर कायम राहिली. त्यानंतर अनुक्रमे एचडीएफसी बँक, टीसीएस, भारती एअरटेल, आयसीआयसीआय बँक, भारतीय स्टेट बँक, इन्फोसिस, बजाज फायनान्स, हिंदुस्तान युनिलिव्हर आणि आयटीसी यांचा क्रमांक राहिला.

दरम्यान, ट्रम्प यांच्या टॅरिफ घोषणेमुळे भारतासह जगभरातील बाजारात प्रचंड घसरण पाहायला मिळत आहे. अमेरिकेतील बाजारात प्रचंड घसरण दिसून आली आहे. त्यामुळे या आठवड्यात देखील भारतीय बाजारात मोठे चढउतार पाहायला मिळू शकतात.