मुंबई – माफिया डॉन करीम लाला आणि माजी पंतप्रधान इंदिरा गांधी यांच्या भेटीविषयीचे वक्तव्य शिवसेना खासदार संजय राऊत यांनी केले होते. यावर काँग्रेसचे नेते मिलिंद देवरा आणि संजय निरुपम यांनी आक्षेप घेतला. यानंतर काही तासातच संजय राऊत यांनी एका पाऊल मागे घेतले. आणि दिवंगत इंदिरा गांधींबद्दलचे वक्तव्य मागे घेतल्याचे जाहीर केले आहे.

संजय राऊत म्हणाले कि, इंदिरा गांधी या देशाच्या सर्वोच्च, प्रभावशाली नेत्या, प्रखर राष्ट्राभिमानी नेत्या होत्या. आमच्याकडून इंदिरा गांधी यांची प्रतिमा भंग होईल, असे कोणतेही वक्तव्य केलेले नाही. तरीही कोणाच्या भावना दुखावल्या असतील तर मी माझे वक्तव्य मागे घेतो, असे त्यांनी म्हंटले आहे.

Sanjay Raut, Shiv Sena on his statement ‘Indira Gandhi used to go & meet Karim Lala (underworld don)’: Our friends from Congress need not feel hurt. If someone feels that my statement has hurt the image of Indira Gandhi ji or hurt someone’s feelings, I take back my statement. pic.twitter.com/7fV6Y4KyhU

— ANI (@ANI) January 16, 2020

दरम्यान, संजय राऊत यांच्या या वक्तव्यासंदर्भात कॉंग्रेस नेते मिलिंद देवरा यांनी ट्‌विट केले. त्यामध्ये त्यांनी असे म्हटले आहे की, इंदिरा गांधी या खऱ्या देशभक्त होत्या. त्यांनी भारताच्या राष्ट्रीय सुरक्षेशी कधीच तडजोड केली नाही. मुंबई कॉंग्रेसचा माजी अध्यक्ष या नात्याने मी संजय राऊत यांच्याकडे चुकीची माहिती देणारे वक्तव्य मागे घेण्याची मागणी करतो असे मिलिंद देवरा यांनी सांगितले होते. तसेच, राजकीय नेत्यांनी दिवंगत पंतप्रधानांविषयी बोलण्यापूर्वी संयम ठेवला पाहिजे असं देखील देवरा यांनी सांगितले होते.

तर, कॉंग्रेसचे नेते संजय निरुपम यांनी देखील ट्‌विट करत संजय राऊत यांच्यावर टीका केली होती. त्यांनी संजय राऊत यांना शेरोशायरीच करण्याचा सल्ला दिला आहे. संजय निरुपम यांनी ट्‌विटमध्ये असे म्हटले आहे की, शिवसेनेच्या मिस्टर शायरांनी इतरांच्या हलक्‍या-फुलक्‍या शायरी ऐकवत महाराष्ट्राचे मनोरंजन करणेच चांगले राहील, असा टोमना त्यांनी संजय राऊत यांना लगावला होता. तसेच, माजी पंतप्रधान इंदिरा गांधी यांच्याविषयी अपप्रचार केलात, तर पश्‍चातापाची वेळ येईल. काल संजय राऊतांनी इंदिरा गांधींविषयी जे वक्तव्य केले, ते मागे घ्यावे अशी मागणी संजय निरुपम यांनी केली होते.