शिरूर : गोवा राज्यात विक्रीसाठी असलेले विदेशी मद्य महाराष्ट्रात आणून, त्याची बनावट पद्धतीने विक्री करून मोठा नफा कमावण्याच्या उद्देशाने साठवून ठेवलेला २५ लाख ५१ हजार ६५० रुपये किमतीचा मद्यसाठा राज्य उत्पादन शुल्क विभागाच्या शिरूर पथकाने जप्त केला आहे. ही कारवाई ३ सप्टेंबर रोजी पहाटे सुमारे १.३० वाजता कारेगाव-करडे रस्त्यालगत, वृंदावन मंगल कार्यालयाजवळील मोकळ्या जागेत करण्यात आली.

या कारवाईत संदीप नानाभाऊ रणपिसे (वय ४४, रा. पोंदेवाडी, ता. आंबेगाव, जि. पुणे) आणि रमेश कांताराम जगताप (वय २५, रा. हॉटेल भव्यासाहेब, कारेगाव, ता. शिरूर; मूळ रा. दानेवाडी, राजापूर, ता. श्रीगोंदा, जि. अहिल्यानगर) यांना अटक करण्यात आली आहे.

गुप्त बातमीदाराकडून मिळालेल्या माहितीनुसार, राज्य उत्पादन शुल्क विभागाच्या पथकाने कारेगाव येथे छापा टाकला. तपासणीदरम्यान गोवा राज्यात निर्मित व विक्रीसाठी असलेले विविध प्रकारचे विदेशी मद्य, तसेच टाटा १५१२ सीआरएक्स बीएस-४ सहाचाकी ट्रक (क्र. एमएच-१२-आरएन-९९०७) आणि मारुती सुझुकी स्विफ्ट डिझायर झेडडीआय (क्र. एमएच-१२-पीसी-२९८२) ही दोन वाहने असा एकूण २५.५१ लाख रुपयांचा मुद्देमाल आढळून आला.

अधिक चौकशी केली असता, सदर मद्य परराज्यातून कमी दरात आणून महाराष्ट्रातील दराने विक्री करण्याचा तसेच महाराष्ट्रात विक्रीसाठी असलेल्या रिकाम्या बाटल्यांमध्ये मद्य भरून त्याच कंपनीचे असल्याचे भासवून विक्री करण्याचा प्रयत्न असल्याचे आरोपींकडून सांगण्यात आल्याचे विभागाने नमूद केले आहे.

या प्रकरणात मुंबई दारूबंदी कायदा १९४९ मधील कलम ६५(अ), ६५(ई), ८०, ८१, ८३, ९०, १०३ व १०८ अन्वये कारवाई करण्यात आली आहे. घटनास्थळी पंचनामा करून दोन्ही आरोपींना ताब्यात घेण्यात आले. दरम्यान, हे मद्य नेमके कोणाकडून खरेदी करण्यात आले, महाराष्ट्रात आणण्यासाठी कोणत्या मार्गाचा वापर करण्यात आला, या व्यवहारात आणखी कोणाचा सहभाग आहे का आणि परराज्यातून मद्य आणून महाराष्ट्रात विक्री करणारी टोळी सक्रिय आहे का, याबाबत राज्य उत्पादन शुल्क विभागाकडून अधिक तपास सुरू आहे.

ही कारवाई विभागीय उपायुक्त सागर धोमकर, अधीक्षक आर. आर. कोले, उपअधीक्षक सुजित पाटील व गणेश कसरे यांच्या मार्गदर्शनाखाली शिरूर विभागाचे निरीक्षक एम. एन. झेंडे यांच्या पथकाने केली. कारवाईत राज्य उप्तादन शुल्क विभाग शिरूर चे दुय्यम निरीक्षक व्ही. व्ही. शिंदे, के. टी. डुंबरे, एस. एस. बाली, जवान बी. एस. रणसुरे, एम. पी. बनसोडे, एम. एस. पोटे तसेच महिला जवान यू. आर. वारे यांनी सहभाग घेतला. या प्रकरणी जवान बी. एस. रणसुरे यांनी फिर्याद दिली असून पुढील तपास निरीक्षक एम. एन. झेंडे करीत आहेत.