पुणे – आमदार रवींद्र धंगेकर यांना केवळ १६ महिन्यांचीच आमदारकी मिळाली. मात्र, या अवधीत त्यांनी ससूनमधील ड्रग्ज रॅकेट उघडकीस आणून संपूर्ण महाराष्ट्रातील मादक द्रव्यांच्या तस्करीवर कारवाई करण्यास सरकारला भाग पाडले. त्यांची ही कामगिरी महाराष्ट्राच्या आणि तरुण पिढीच्या भवितव्याच्या दृष्टीने अत्यंत हितकारी ठरली. त्यामुळे धंगेकर यांना आपण दिलेले मत संपूर्ण महाराष्ट्राच्या सार्थकी लागते, असा विश्वास त्यातून निर्माण झाला आहे.

कसबा विधानसभा मतदारसंघातील मतदारांनी धंगेकरांनाच मतदान करावे, असे आवाहन माजी महापौर शांतीलाल सूरतवाला यांनी केले आहे. सूरतवाला यांनी याबाबत एक प्रत्रक प्रसिद्धीस दिले आहे. त्यात धंगेकर यांनी ससूनमधील मादक द्रव्य गैरव्यवहाराचे रॅकेट उघडकीस आणल्यामुळे पाच पोलीस निलंबित झाले. त्याची पाळेमुळे राज्यभर असल्याची माहिती तपासात निष्पन्न झाली. धंगेकर यांनी केलेल्या पाठपुराव्यामुळेच हे घडले.

बेकायदेशीर पब्ज आणि हुक्का पार्लर यांच्याविरोधात कोणीतरी लोकप्रतिनिधींनी आक्रमक होऊन आवाज उठवायला पाहिजे होता, ती जबाबदारी धंगेकर यांनी समर्थपणे पार पाडली. त्यामुळे धंगेकर यांच्या पाठीशी उभे राहणे हे केवळ कसबा विधानसभा मतदारसंघातील नागरिकांच्याच हिताचे नव्हे, तर संपूर्ण पुणेकरांच्या हिताचे आहे, असेही सूरतवाला यांनी म्हटले आहे.

नारायण पेठेत पदयात्रा

धंगेकर यांच्या प्रचारार्थ सायंकाळी नारायण पेठेतील मुरलीधर भोजनालय येथून पदयात्रेस प्रारंभ झाला. ओंकारेश्वर मंदिर, अहिल्यादेवी शाळा, नेने घाट, मेहुणपुरा, केसरी वाडा, गरुड गणपती, भरत नाट्यमंदिर, चिमण्या गणपती असा शनिवार, सदाशिव, नारायण पेठ येथून खजिना विहीर विठ्ठल मंदिर येथे पदयात्रेची सांगता करण्यात आली. महाविकास आघाडीचे तिन्ही पक्षांचे पदाधिकारी व कार्यकर्ते पदयात्रेत सहभागी झाले होते.