कोलंबो : आर्थिक दिवाळखोरीत निघालेल्या श्रीलंकेला सावरण्यासाठी आज देशात राष्ट्रपतीपदाची  निवडणूक पार पडली. या निवडणुकीत रानिल विक्रमसिंघे यांनी बाजी मारली असून त्यांची श्रीलंकेच्या राष्ट्रपतीपदी निवड करण्यात झाली आहे. विक्रमसिंघे 134 मतांनी विजयी झाले आहेत. रानिल विक्रमसिंघे यांच्या रुपात श्रीलंकेला नवे राष्ट्रपती मिळाले आहेत.

श्रीलंकेमध्ये आज राष्ट्रपतीपदासाठी निवडणूक पार पडली आहे. राष्ट्रपतीपदाच्या शर्यतीत प्रबळ दावेदार मानले जाणारे साजिथ प्रेमदासा शर्यतीत बाहेर पडल्यानंतर राष्ट्रपतीपदासाठी रानिल विक्रमसिंघे विरुद्ध डलास अलाहाप्पेरुमा यांच्यात संघर्ष होता. रानिल विक्रमसिंघे यांच्या विरुद्ध एसएलपीपी खासदार डलास अलाहाप्पेरुमा हे सत्ताधारी पक्षाचे उमेदवार होते. विक्रमसिंघे यांनी डलास अलाहाप्पेरुमा यांचा पराभव केला आहे.

श्रीलंका सध्या भीषण आर्थिक संकटाचा सामना करत आहे. तत्कालीन राष्ट्रपती गोटाबाया राजपक्षे यांनी पलायन करून राजीनामा दिल्यानंतर रानिल विक्रमसिंघे यांच्याकडे कार्यवाहक राष्ट्रपतीपदाची जबाबदारी होती. पंतप्रधान असताना त्यांच्या कार्यवाहक राष्ट्रपतीपदाचीजबाबदारी देण्यात आली. त्यानंतर आज राष्ट्रपतीपदाची निवडणूक पार पडली. यामध्ये रानिल विक्रमसिंघे यांनी 134 मतांनी विजय मिळवला आहे. 225 खासदारांनी राष्ट्रपतीपदाच्या निवडणूकीत मतदान केले. विजयासाठी उमेदवाराला 113 हून अधिक मतं मिळवणं आवश्यक होते. या निवडणुकीत रानिल विक्रमसिंघे 134 मते मिळवत बहुमत मिळवत राष्ट्रपतीपदी विराजमान झाले आहेत.

श्रीलंकेत आर्थिक संकटाची परिस्थिती निर्माण झाली आहे, तेव्हापासून भारत हा एकमेव देश आहे जो श्रीलंकेला सातत्याने मदत करत आहे. यामुळे श्रीलंकेतील जनता आणि सरकार पंतप्रधान नरेंद्र मोदी आणि भारत सरकारला सातत्याने आवाहन करत आहे. बदलत्या राजकीय समीकरणाच्या पार्श्वभूमीवर भारताने आपली भूमिका बदलू नये, असे आवाहन श्रीलंकेने केले आहे. कारण भारताच्या मदतीने श्रीलंका या संकटातून मार्ग काढण्याचा प्रयत्न करत आहे.