नसरापूर (ता. भोर) : जागतिक वसुंधरा दिनाचे औचित्य साधत नसरापूर गावातील विविध शाळांचे विद्यार्थी, शिक्षक, स्वयंसेवक आणि ग्रामस्थ यांनी शिवगंगा नदीच्या स्वच्छतेसाठी एकत्र येत एक भव्य स्वच्छता मोहीम राबवली. पर्यावरण रक्षणाचा संदेश देताना शेकडो विद्यार्थ्यांनी नदीपात्रातील घाण, प्लास्टिक कचरा आणि इतर प्रदूषण हटवून परिसर पुन्हा स्वच्छ आणि सुंदर बनवला.

या उपक्रमात प्राथमिक व माध्यमिक शाळांचे विद्यार्थी, स्थानिक ग्रामपंचायत सदस्य, स्वयंसेवी संस्था तसेच विविध सामाजिक गट सहभागी झाले होते. दोन तासांहून अधिक काळ चाललेल्या या मोहिमेत सर्वांनी कचरा उचलणे, वेगवेगळ्या प्रकारचा कचरा वर्गीकरण करणे आणि योग्य पद्धतीने विल्हेवाट लावणे यावर भर दिला.

शाळांतील मुख्याध्यापक रेवती पवार, विक्रम कदम, राहुल शेटे, संगीत घाडगे, वैशाली भारेकर यांच्या मार्गदर्शनाखाली विद्यार्थ्यांनी स्वच्छतेचे महत्त्व पटवून घेतले. तसेच ग्रामपंचायत सदस्य, उपसरपंच, तलाठी, आरोग्य अधिकारी, विविध सामाजिक कार्यकर्ते यांनीही उपस्थित राहून विद्यार्थ्यांना प्रोत्साहन दिले.

हातमोजे आणि मास्क घालून विद्यार्थ्यांनी नदीतील कचरा हटवताना स्वच्छतेचे भान पाळले. या मोहिमेमुळे विद्यार्थ्यांमध्ये पर्यावरणपूरक जीवनशैलीची बीजे पेरली गेली. “स्वच्छता हीच सेवा” या तत्त्वावर चालत प्रत्येकाने आपली जबाबदारी ओळखून काम केले.

ही मोहीम केवळ एकदाच न थांबवता, परिसरातील प्रत्येक व्यक्तीने आपापल्या पातळीवर स्वच्छतेसाठी प्रयत्न करावेत असा संदेश देण्यात आला. पर्यावरण रक्षणासाठी नागरिकांमध्ये जनजागृती होणे गरजेचे असल्याचे मत उपस्थित मान्यवरांनी व्यक्त केले. नसरापूरच्या विद्यार्थ्यांनी वसुंधरा दिनाचे औचित्य साधत ‘स्वच्छता हीच सेवा’ हा संदेश प्रत्यक्ष कृतीने समाजासमोर ठेवला. ही फक्त एक दिवसाची मोहीम नसून पुढील काळातही अशीच जागृती ठेवण्याचा निर्धार त्यांनी व्यक्त केला.

ज्याप्रमाणे एका थेंबाने सागर तयार होतो, त्याचप्रमाणे एकेक नदी स्वच्छ करत आपण पुन्हा निसर्गाचे गोडवे गाणारे बनू शकतो.नसरापूरकरांनी दाखवलेली ही एकजूट आणि निसर्गप्रेम सर्वांसाठी प्रेरणादायी ठरतेय! या मोहिमेसाठी सरपंच उषा कदम, उपसरपंच नामदेव चव्हाण, ग्रामसेवक विजय कुलकर्णी, आरोग्य सेविका लीलावती शिवाजी निकम यांनी मार्गदर्शन केले. ग्रामस्थांनीही मोठ्या संख्येने स्वयंस्फूर्तीने सहभाग घेतला. प्लास्टिकमुक्त नदीसाठी भविष्यात दर महिन्याला असे उपक्रम राबवण्याचा निर्धार करण्यात आला.