Mayor of Mumbai : मुंबई महापालिका निवडणुकीनंतर आता महापौर आणि उपमहापौर पदाच्या हालचाली सुरू झाल्या आहेत. ७ फेब्रुवारीला महापौरपदासाठी अर्ज स्विकारले जाणार असून, ११ फेब्रुवारीला मुंबईचा महापौर निवडला जाणार आहे. यासाठी याच दिवशी १२ वाजता विशेष सभेचे आयोजन करण्यात आल्याची माहिती समोर आली आहे.

या सगळ्यात आता शिवसेना ठाकरे गट सुद्धा महापौर उपमहापौर पदासाठी उमेदवार देणार असल्याची शक्यता वर्तवली जात आहे. मात्र, या पदांसाठी उमेदवारी अर्ज कोण सादर करणार हे अद्याप गुलदस्त्यात आहे. भाजप आणि शिंदेंच्या शिवसेनेचे संख्याबळ जास्त असताना सुद्धा शिवसेना ठाकरे गट सुद्धा महापौर उपमहापौर पदाचा उमेदवार देण्याची शक्यता आहे. त्यामुळे ७ फेब्रुवारीला शिवसेना ठाकरे गट महापौर उपमहापौर पदाचा उमेदवाराचा अर्ज भरणार का याकडे लक्ष असणार आहे.

मातोश्रीवर निर्णय होणार? 

मिळालेल्या माहितीनुसार, या संदर्भात उबाठातील अनुभवी नगरसेकांसाठी विशेष बैठकीचे आयोजन करण्यात आले आहे. गटनेत्या म्हणून किशोरी पेडणेकर आहेत. ठाकरेंचे ६५ नगरसेवक पालिकेवर निवडून आलेले आहेत. ठाकरेंकडे संख्याबळ नसले तरी महापौर उपमहापौर पदाचा अर्ज भरण्याचा ठाकरेच्या शिवसेनेचा विचार सुरू असल्याची माहिती समोर आली आहे.

दुसरीकडे भाजप आणि शिवसेना पक्षात महापौर पदावरून जोरदार रस्सीखेच गेल्या काही दिवसांपासून सुरू असल्याची चर्चा आहे. भाजपकडून महापौरपदासाठी, तेजस्वी घोसाळकर, राजश्री शिरवडकर, अलका केरकर, रितू तावडे यांच्यासह काहींची नावे चर्चेत आहेत. तर शिवसेनेचा (शिंदे गट) उपमहापौर होणार का, यावरही अद्याप निर्णय नाही. त्यामुळे ७ फेब्रुवारी अर्ज भरण्यानंतरच नावे समोर येतील.

२२७ नगरसेवक असलेल्या मुंबई महापालिकेचे महापौर पद सर्वसाधरण गट महिलेसाठी आरक्षित करण्यात आले आहे. त्यामुळे भाजपकडून महापौर पदासाठी मोठी चाचपणी करण्यात आली असून, नाव अंतिम करण्यावर बरीच चर्चा झाली असल्याची माहिती आहे. त्यामुळे महापौर पदासाठी कोणाचे नाव समोर येते हे पाहणे महत्वाचे असणार आहे. या महापालिकेत भाजपचे ८९ नगसेवक निवडून आले आहेत. शिवसेना शिंदेंचे २९ नगसेवक विजयी झाले आहेत, तर उद्धव ठाकरेंनी तगडी फाईट देत ६५ उमेदवार निवडून आणले आहेत. काँग्रेसला मात्र दोन जागांवर समाधान मानावे लागले आहे.

हेही वाचा : Shamita Shetty: शमिता शेट्टीने अफेअरच्या अफवांवर दिली स्पष्ट प्रतिक्रिया