Sonakshi Sinha News : बॉलीवूडची प्रसिद्ध कोरिओग्राफर आणि दिग्दर्शिका फराह खान सध्या तिच्या कुकिंग व्लॉगमुळे चर्चेत आहे. फराह आपल्या कुक दिलीपसोबत अनेकदा कलाकारांच्या घरी जाऊन त्यांच्यासोबत स्वयंपाक करत मस्ती करताना दिसते. याच व्लॉगसाठी ती नुकतीच अभिनेत्री सोनाक्षी सिन्हा आणि तिचा पती जहीर इकबाल यांच्या मुंबईतील घरी पोहोचली होती. सोनाक्षी-जहीरचं आलिशान घर पाहून फराह अक्षरशः थक्क झाली.

घराच्या बाहेर उभं राहिल्यावरच त्यांचा मोठा आणि भव्य गेट पाहून फराह आणि दिलीप चकित झाले. दिलीपने गंमतीने इतकं मोठं दार पाहून एखाद्या फिल्म स्टुडिओत शिरल्यासारखं वाटत असल्याचं म्हटलं. घरात पाऊल टाकताच फराहने सोनाक्षीला हे घर आहे की शूटिंग स्टुडिओ, असा प्रश्न विचारला. त्यावर सोनाक्षीनेही मजेशीर उत्तर देत, शूटिंगसाठी बुकिंग घेऊ शकतो, असं सांगितलं.

फराहने सोनाक्षी-जहीरच्या घराची तुलना थेट महबूब स्टुडिओशी केली आणि त्यांनी स्वतःचं स्टुडिओच उभारल्याचा विनोद केला. एवढंच नाही तर सोनाक्षीने घरात एका कोपऱ्यातून दुसऱ्या कोपऱ्यात जाण्यासाठी वापरली जाणारी लहान मुलांची तीन चाकी स्कूटीही फराहला दाखवली, ज्यामुळे सगळेच हसले.
या भेटीत सगळ्यांनी मिळून चंपारण मटन बनवलं. या व्लॉगमध्ये सोनाक्षीची आई पूनम सिन्हा आणि जहीरची आई मुमताज रतनसी देखील दिसल्या, त्यामुळे संपूर्ण वातावरण अधिक आपुलकीचं आणि घरगुती झालं. फराहने त्यांच्या एंटरटेनमेंट एरियाचीही पाहणी केली. तिथला मोठा फ्लोटिंग टीव्ही पाहून तिने घरातच थिएटर तयार केल्याचा विनोद केला. याशिवाय मित्रांकडून मिळालेल्या वेगवेगळ्या गिफ्ट्सनेही फराहचं लक्ष वेधून घेतलं, विशेषतः अभिनेत्री हूमा कुरैशीने दिलेला लाल रंगाचा फ्रिज.

दरम्यान, फराहने सोनाक्षीच्या प्रेग्नेंसीबाबत सुरू असलेल्या अफवांवरही गंमतीने भाष्य केलं. तिने हसत म्हटलं की लग्नानंतरपासून सोनाक्षी कायम प्रेग्नेंटच असल्याचं ऐकू येतं. त्यावर सोनाक्षीनेही मजेशीर उत्तर देत आपण गेल्या १६ महिन्यांपासून प्रेग्नेंट असल्याचं सांगितलं. उल्लेखनीय म्हणजे, सोनाक्षी आणि जहीर यांचा विवाह २३ जून २०२४ रोजी झाला असून तेव्हापासून त्यांच्या प्रेग्नेंसीच्या चर्चा सोशल मीडियावर सुरू आहेत.