सोलापूर – जिल्ह्यातील बार्शी तालुक्यातील पांगरीमध्ये फटाका फॅक्टरीत भीषण स्फोट होऊन तीन कामगारांचा मृत्यू झाला आहे तर 9 कामगार जखमी झाले. फटाके बनवण्याचे काम सुरु असताना हा भीषण स्फोट झाला. घटनेतील मृतांचा आकडा वाढण्याची भीती आहे. जखमींना रुग्णालयात उपचारासाठी हलवण्यात आले आहे, सोलापूरचे जिल्हाधिकारी मिलिंद शंभरकर यांनी ही माहिती दिली.

पांगरी शिराळा रस्त्यावरील फटाका फॅक्टरीमध्ये जवळपास 40 कर्मचारी काम करत होते. घटनेनंतर तात्काळ अग्निशमन दल, पोलीस आणि प्रशासन घटनास्थळी दाखल झाले आहे. घटनेनंतर मोठा आवाज परिसरात झाला. तसेच धुराचे आणि आगीचे लोट परिसरात दिसून येत होते. रविवारी दुपारी चारच्या सुमारास भीषण घटना घडली. दुर्घटनेतील जखमींना तातडीने पांगरी येथील ग्रामीण रुग्णालय तसेच बार्शीतील दवाखान्यांमध्ये उपचारासाठी हलवण्यात आले आहे. नववर्षाच्या पहिल्या दिवशी भीषण घटना घडल्याने बार्शी तालुक्यासह सोलापूर जिल्ह्यातून हळहळ व्यक्त करण्यात येत आहे.