Inflation: आधीच इंधन दरवाढीचा सामना करणाऱ्या सर्वसामान्यांच्या अडचणीत आता आणखी भर पडणार आहे. मिडल इस्टमध्ये (मध्य पूर्व आशिया) सुरू असलेल्या तणावाचा थेट परिणाम आता भारतीयांच्या स्वयंपाकघरावर होताना दिसत आहे. कच्च्या तेलाच्या वाढत्या किमती आणि रुपयाचे अवमूल्यन यामुळे एफएमसीजी (FMCG) कंपन्या आपल्या उत्पादनांच्या किमती वाढवण्याच्या तयारीत आहेत. केव्हा आणि किती होणार दरवाढ? ‘नुवामा इन्स्टिट्यूशनल इक्विटीज’च्या अहवालानुसार, कच्च्या मालाच्या किमतीत झालेली वाढ पाहता, कंपन्यांना आता जुन्या दरात उत्पादन विकणे कठीण झाले आहे. परिणामी, आर्थिक वर्ष २०२७ च्या पहिल्या तिमाहीत दैनंदिन वापराच्या वस्तूंच्या किमतीत ३ ते ४ टक्क्यांनी वाढ होण्याची शक्यता आहे. किंमत वाढण्यामागची मुख्य कारणे पॅकेजिंग खर्च: कोणत्याही FMCG उत्पादनाच्या एकूण खर्चापैकी १५ ते २०% खर्च हा केवळ प्लास्टिक बाटल्या, टोपणं आणि रॅपर्सवर होतो. कच्च्या तेलाचे दर वाढल्याने पॉलीप्रोपाइलीन आणि पॉलीइथाइलीन सारखे पेट्रोकेमिकल्स महागले आहेत. कच्चे तेल $१०० च्या पार: आंतरराष्ट्रीय बाजारात कच्चे तेल प्रति बॅरल १०० डॉलरच्या जवळ पोहोचले आहे. पेंट कंपन्यांसाठी ४०% कच्चा माल हा क्रूड डेरिव्हेटिव्ह्सवर अवलंबून असतो, त्यामुळे पेंट्सच्या किमतीत मोठी वाढ होऊ शकते. पाम ऑइलची दरवाढ: साबण आणि डिटर्जंट उद्योगासाठी लागणारे पाम ऑइल महागल्याने या वस्तूंच्या किमती वाढणे निश्चित मानले जात आहे. या क्षेत्रांवर होणार सर्वाधिक परिणाम – पेंट इंडस्ट्रीएशियन पेंट्स आणि बर्जर पेंट्स सारख्या कंपन्यांनी दरवाढ सुरू केली आहे. साबण आणि डिटर्जंटपाम ऑइल आणि महागड्या पॅकेजिंगमुळे दरात मोठी वाढ अपेक्षित आहे. जागतिक अनिश्चिततेमुळे खाद्यतेलाचे भाव वधारणार. हवामानाचा फटका: उन्हाळी उत्पादनांची विक्री घटली केवळ महागाईच नाही, तर अवकाळी पावसाचाही फटका कंपन्यांना बसला आहे. मार्च महिन्यात उत्तर आणि पूर्व भारतात झालेल्या पावसामुळे आइस्क्रीम, थंड पेये आणि टॅल्कम पावडरच्या मागणीत घट झाली आहे. याचा थेट परिणाम वरुण बेव्हरेजेस आणि युनायटेड ब्रुअरीज सारख्या कंपन्यांच्या तिमाही निकालांवर होण्याची शक्यता आहे. इंधन दरवाढीनंतर आता ‘किचन बजेट’ कोलमडण्याची चिन्हे असून, येणाऱ्या काही महिन्यांत महागाईचा चटका अधिक तीव्र होणार आहे.