SL vs AFG 2nd ODI , Sri Lanka Won : चरित असलंकाची दमदार फलंदाजी आणि वानिंदू हसरंगाच्या फिरकीच्या जोरावर श्रीलंकेने दुसऱ्या वनडेत अफगाणिस्तानचा 155 धावांनी पराभव केला. श्रीलंकेकडून प्रथम खेळताना चरित असलंकाने 97 धावांची खेळी केली. त्यामुळे श्रीलंकेने 308 धावा केल्या. यानंतर, वानिंदू हसरंगाच्या फिरकीसह इतर गोलंदाजाच्या शानदार कामगिरीच्या पुढे अफगाणिस्तानच्या 9 विकेट केवळ 25 धावांत पडल्या, त्यामुळे त्यांचा संघ 153 धावांवर गडगडला आणि त्यांना 155 धावांनी पराभवाला सामोरे जावे लागले. यासह दुसऱ्या एकदिवसीय सामन्यात दणदणीत विजय मिळवत श्रीलंकेने तीन सामन्यांची मायदेशातील वनडे मालिका 2-0 अशी खिशात घातली.
It’s the Sri Lankan bowlers’ show! 💪
They skittled out the Afghanistan batters for just 153 runs, sealing a dominant 155-run victory! ✨🇱🇰 take an unassailable 2-0 lead in the series! 🏆 Way to go, boys! #SLvAFG pic.twitter.com/EZBWHnZHfQ
— Sri Lanka Cricket 🇱🇰 (@OfficialSLC) February 11, 2024
असलंकाची 97 धावांची नाबाद खेळी…
पल्लेकेलेच्या मैदानावर श्रीलंकेची सुरुवात चांगली झाली नाही आणि 36 धावसंख्येवरच त्यांचे दोन्ही सलामीचे फलंदाज पॅव्हेलियनमध्ये गेले होते. मात्र यानंतर कुसल मेंडिस आणि तिसऱ्या क्रमांकावर आलेल्या सदिरा समरविक्रमा यांच्यात तिसऱ्या विकेटसाठी 103 धावांची भागीदारी झाली. त्यानंतर सदिरा 61 चेंडूत तीन चौकारांसह 52 धावा करून माघारी परतला. यानंतर मेंडिसही 65 चेंडूंत 6 चौकार आणि 1 षटकारासह 61 धावा करून बाद झाला. पण नंतर पाचव्या क्रमांकावर फलंदाजीला आलेल्या चरित असलंकाने फलंदाजी करताना धुमाकूळ घातला आणि शेवटपर्यंत 74 चेंडूंत 9 चौकार आणि दोन षटकारांसह 97 धावांची नाबाद खेळी खेळली पण शतक करण्यास तो अपयशी ठरला. तर झेनिथ लियानागेनेही 48 चेंडूंत दोन चौकार आणि दोन षटकारांसह 50 धावा केल्या. त्यामुळे प्रथम फलंदाजी करताना श्रीलंकेने निर्धारित 50 षटकात 6 गडी गमावून 308 धावसंख्येपर्यत मजल मारली होती.
अवघ्या 25 धावांत अफगाणिस्तानने गमावल्या 9 विकेट…
विजयासाठी 309 धावांचा पाठलाग करणाऱ्या अफगाणिस्तान संघाला 31 धावांच्या स्कोअरवर रहमानउल्ला गुरबाज (8 धावा) च्या रूपाने पहिला धक्का बसला. मात्र, यानंतर इब्राहिम झद्रान आणि रहमत शाह यांनी संघाची धुरा सांभाळत संघाची धावसंख्या 100 च्या पुढे नेली. या दोघांची फलंदाजी पाहून अफगाणिस्तान हा सामना सहज जिंकेल असे वाटत होते. पण त्यानंतर श्रीलंकेचा स्टार फिरकी गोलंदाज वानिंदू हसरंगा गोलंदाजीत उतरला.
हसंरगाच्या गोलंदाजीपूर्वी असिथा फर्नांडोने 128 धावांवर इब्राहिम झद्रान (54 धावा) याला बाद केले. यानंतर हसरंगाने आपल्या गोंलदाजीची जादू सुरू केली. यानंतर सेट दिसत असलेल्या रहमत शाहला (63 धावा) त्याने पॅव्हेलियनचा रस्ता दाखवला. हसरंगा इथेच थांबला नाही, त्याने अफगाणिस्तानचा कर्णधार हसमतुल्ला शाहिदी (9 धावा), मोहम्मद नबी (1 धावा) आणि गुलबदिन नायब (0 धावा) यांनाही तंबूचा रस्ता दाखवला.
वानिंदू हसरंगाला इतर गोलंदाजांनी सुरेख साथ लाभली. यानंतर अफगाणिस्तानच्या इतर फलंदाजांना एकापाठोपाठ पॅव्हेलियनमध्ये पाठवण्याचे काम इतर गोलंदाजांनी केले. श्रीलंकन संघाच्या या शानदार गोलंदाजीमुळे अफगाणिस्तानच्या शेवटच्या 9 फलंदाजांना केवळ 25 धावांची भर घालता आली. इब्राहिम आणि रहमतशिवाय इतर 9 फलंदाज दुहेरी आकडाही पार करू शकले नाही. या सामन्यात हसरंगाने शानदार गोलंदाजी करत 6.5 षटकात 27 धावा देत 4 बळी घेतले. त्याने शाह, शाहिदी, नबी आणि नायब यांच्या महत्त्वपूर्ण विकेट घेतल्या. तर असिथा फर्नांडो आणि दिलशान मदुशंका यांनी प्रत्येकी 2-2 विकेट घेतल्या. तर प्रमोद मदुशन याला 1 यश मिळाले.