तिसरी कसोटी संपली आता चौथ्या कसोटीत खेळताना इंग्लंड संघातील प्रमुख फलंदाजांनी आपल्या फिरकी गोलंदाजी खेळण्याच्या तंत्रात सुधारणा करणे गरजेचे आहे. केवळ टीका करुन मालिका जिंकता येत नाहीत, त्यासाठी फलंदाजांनाच खेळात सुधारणा घडवावी लागते. खेळपट्टीवरून रडगाणे गात बसण्यापेक्षा इंग्लंडने खेळ सुधारायला हवा. चौथ्या सामन्यात आपल्याला अशाच खेळपट्टीवर खेळावे लागेल अशी मानसिकताही तयार करणे आवश्‍यक आहे, असा टोलाही त्यांनी मारला.

अहमदाबादच्या कसोटी सामन्याबाबत मला अनेकांनी प्रश्‍न विचारले. ज्या खेळपट्टीवर सामना झाला त्यावरुन बरीच टीकाही होत आहे. मात्र, जे टीका करतायेत त्यांना हे समजायला पाहिजे की, की तुम्हाला अनेकदा सीमिंग खेळपट्टी मिळते, गुड लेंथवरुन उसळी घेणारे चेंडू बघितल्यावर ही खेळपट्टी फलंदाजांसाठी कठीण असल्याचे सांगितले जाते पण त्यात तथ्य नाही.

अनेकदा फलंदाजांना अशा खेळपट्टीचा सामना करावा लागतो. यालाच कसोटी क्रिकेट म्हणतात. आव्हानात्मक नसेल ती कसोटी ठरणारच नाही. अशाच खेळपट्टीवर फलंदाजाची मानसिकता व तंत्र यांचा कस लागतो. तुम्ही भारतात मालिका खेळत आहात तर, तुम्हाला अशाच खेळपट्टीवर खेळावे लागते. तशी मानसिकता मालिकेपूर्वीच होणे गरजेचे आहे, असेही ते म्हणाले.

भारत आणि इंग्लंडमध्ये अहमदबादच्या नरेंद्र मोदी स्टेडियममध्ये झालेला तिसरा कसोटी सामना दोनच दिवसांत संपला. भारताने 10 गडी राखून या सामन्यात दणदणीत विजय मिळवला. आता दोन्ही संघांमधील मालिकेतील चौथा आणि अखेरचा कसोटी सामना 4 मार्चपासून अहमदाबादमध्येच होणार आहे. या सामन्यासाठी कशी खेळपट्टी असेल यावरही आता चर्चा सुरू झाली आहे.