SIR Campaign Pune – पुणे जिल्ह्यात वाढते नागरीकरणे, वाढते स्थलांतर, मोठी लोकसंख्या या आव्हानात्मक परिस्थितीत पुणे जिल्ह्यात मतदारांचे ५५ टक्के मॅपिंग पूर्ण झाले आहे. आता जिल्ह्यात प्रत्यक्ष मतदार सखोल पुनर्निरीक्षणाच्या कार्यक्रमाला (एसआयआर) येत्या ३० जूनपासून सुरुवात होणार आहे. यासंदर्भात जिल्हा प्रशासनाची पूर्ण तयारी झाली आहे. पात्र मतदारांचे मतदार यादीत नाव समाविष्ट असावे आणि अपात्र मतदारांचे नाव यादीतून वगळावे, हाच एसआयआरचा प्रमुख उद्देश असल्याची माहिती जिल्हाधिकारी जितेंद्र डुडी यांनी दिली.

जिल्हाधिकारी कार्यालयात आयोजित पत्रकार परिषदेमध्ये जिल्हाधिकारी डुडी यांनी माहिती दिली. या वेळी उपजिल्हा निवडणूक अधिकारी मीनल कळसकर उपस्थित होत्या. डुडी यांनी सांगितले, की २००२-२००४ मध्ये एसआयआर मोहीम राबविण्यात आली होती. त्यानंतर आता ही प्रक्रिया करण्यात येत आहे. यंदाच्या एसआयआरमध्ये प्रथमच तृतीयपंथी, दिव्यांग, तसेच आदिवासी वर्गातील व्यक्तींच्या नोंदींसाठी विशेष मोहीम राबविली जाणार आहे.

३० जूनपासून बीएलओ घरोघरी जाऊन मतदारांना अर्ज वाटप करणार आहेत. अर्ज वाटप करताना त्या संबंधित मतदार, त्याच्या कुटुंबीयांचा, घराचा पंचनामा करून त्याची माहिती छायाचित्रासह घेतली जाणार आहे. एका महिन्याच्या कालावधीत अर्ज वितरणानंतर राजकीय पक्षांच्या प्रतिनिधींमार्फत भरलेले अर्ज संकलित केले जातील. यासंदर्भात बीएलओंना प्रशिक्षण देण्यात येणार आहे, तसेच राजकीय पक्षांच्या कार्यकर्त्यांच्या बैठका घेण्यात येणार आहेत, अशी माहिती डुडी यांनी दिली.

असे असेल वेळापत्रक
– बीएलओंना प्रशिक्षण – दि. २० ते २९ जून २०२६
– घरोघरी अर्ज वाटप प्रारंभ – ३० जून ते २९ जुलै २०२६
– मतदार यादी तयार करणे- दि.५ ऑगस्ट २०२६
– मतदार यादीवर हरकती, सूचना- दि.५ ऑगस्ट ते ४ सप्टेंबर २०२६
– हरकतींवर प्रत्यक्ष सुनावणी दि. ५ ऑगस्ट ते ३ ऑक्टोबर २०२६
– अंतिम मतदार यादी प्रसिद्ध – दि. ७ ऑक्टोबर २०२६