Sinhgad Dental College – सिंहगड दंत महाविद्यालय आणि रुग्णालयातील शिक्षक व कर्मचाऱ्यांच्या कामबंद आंदोलनामुळे वाऱ्यावर पडलेल्या शेकडो विद्यार्थ्यांच्या शैक्षणिक भविष्याचा मार्ग अखेर मोकळा झाला आहे. या महाविद्यालयातील पदवी (बीडीएस), पदव्युत्तर पदवी (एमडीएस) आणि इंटर्नशिप करणाऱ्या विद्यार्थ्यांचे राज्यातील इतर २४ खासगी विनाअनुदानित दंत महाविद्यालयांमध्ये स्थलांतरण करण्याचा महत्त्वपूर्ण निर्णय राज्य सरकारने घेतला आहे. वैद्यकीय शिक्षण व औषधी द्रव्ये विभागाने यासंदर्भातील शासन निर्णय दि. १२ मार्च रोजी जारी केला आहे. यामुळे गेल्या अनेक महिन्यांपासून चिंतेत असलेल्या विद्यार्थ्यांना मोठा दिलासा मिळाला आहे. सिंहगड दंत महाविद्यालयाची शैक्षणिक वर्ष २०२६-२७ पासूनची संलग्नता महाराष्ट्र आरोग्य विज्ञान विद्यापीठाने रद्द केली आहे. महाविद्यालयातील शैक्षणिक विस्कळीतपणा आणि विद्यार्थ्यांचे होणारे नुकसान लक्षात घेता विद्यापीठाने भारतीय दंत परिषदेकडे या विद्यार्थ्यांच्या स्थलांतराचा प्रस्ताव मांडला होता. या प्रस्तावावर शासनाने विद्यार्थ्यांच्या गुणवत्ता आणि पसंतीक्रमानुसार इतर महाविद्यालयांत त्यांचे वाटप करण्याचे आदेश दिले आहेत. या प्रक्रियेसाठी महाराष्ट्र आरोग्य विज्ञान विद्यापीठ हे सक्षम प्राधिकरण म्हणून काम पाहणार आहे. विशेष म्हणजे विद्यार्थ्यांना त्यांच्या मूळ प्रवेशावेळी मिळणारे शैक्षणिक शुल्क प्रतिपूर्ती आणि शिष्यवृत्तीचे लाभ नव्या महाविद्यालयातही कायम राहतील, असे शासनाने स्पष्ट केले आहे. तसेच, संबंधित संस्थांना या विद्यार्थ्यांकडून कोणतेही अतिरिक्त शुल्क घेता येणार नाही आणि विद्यापीठालाही या वाटप प्रक्रियेसाठी विद्यार्थ्यांकडून कोणतेही शुल्क आकारता येणार नाही. या निर्णयामुळे सिंहगड विद्यार्थ्यांचे शैक्षणिक वर्ष वाया जाण्यापासून वाचले असून, आता लवकरच विद्यापीठाच्या संकेतस्थळावर महाविद्यालय वाटपाची प्रक्रिया सुरू होणार आहे.
