Punjab – पंजाबचे मुख्यमंत्री भगवंत मान यांच्या कार्यक्रमात ड्रग्जच्या समस्येविरोधात काळे झेंडे दाखवणाऱ्या एका शिख तरुणाला पोलिसांनी ताब्यात घेऊन त्याचा कोठडीत अमानुष छळ केल्याचा धक्कादायक आरोप भाजपचे राज्यसभा खासदार आणि राष्ट्रीय सरचिटणीस तरुण चुघ यांनी केला आहे. या गंभीर घटनेची राष्ट्रीय मानवाधिकार आयोगाने स्वतःहून दखल घ्यावी आणि तातडीने कारवाई करावी, अशी मागणी चुघ यांनी शुक्रवारी केली.

तरुण चुघ यांनी राष्ट्रीय मानवाधिकार आयोगाचे सदस्य प्रियंक कानूनगो यांना पत्र लिहून निष्पक्ष चौकशीसाठी एक स्वतंत्र पथक संबंधित पोलीस ठाण्यात व गावात पाठवण्याची मागणी केली आहे. तसेच या प्रकरणातील दोषी पोलीस अधिकाऱ्यांवर तात्काळ एफआयआर नोंदवण्याचे निर्देश द्यावेत, असेही पत्रात म्हटले आहे.

२ सप्टेंबर रोजी शेरॉन गावात मुख्यमंत्री भगवंत मान यांच्या कार्यक्रमादरम्यान आम आदमी पक्ष सरकारच्या ड्रग्जविरोधातील अपयशाचा निषेध करत मोहनजीत सिंग या स्थानिक शिख तरुणाने काळे झेंडे दाखवले होते. त्यानंतर पोलिसांनी त्याला अटक केली.

तरुण चुघ यांनी पत्रात आरोप केला आहे की, मोहनजीत सिंग याला कोठडीत अत्यंत निर्घृणपणे मारहाण करण्यात आली. त्याचे कपडे उतरवून त्याला निर्वस्त्र करण्यात आले. त्याच्या मांड्यांवर ब्लेडने वार करण्यात आले आणि वाहत्या रक्तावर मीठ चोळण्यात आले. एवढेच नाही तर त्याला वारंवार विजेचे शॉक देण्यात आले.

चुघ यांनी मीडिया रिपोर्ट्सचा हवाला देत एक खळबळजनक दावा केला आहे. जेव्हा तरुणाला नग्न करून मारहाण केली जात होती, तेव्हा उपस्थित पोलीस अधिकाऱ्यांनी एका वरिष्ठ व्यक्तीला व्हिडिओ कॉल केला होता. पोलीस अधिकाऱ्यांनी तरुणाची ती रक्ताळलेली आणि गंभीर अवस्था व्हिडिओ कॉलवरून दाखवली. हे जर खरे असेल, तर यामध्ये सत्ताधाऱ्यांचा थेट सहभाग असल्याचे स्पष्ट होते, असा आरोप चुघ यांनी केला.

याशिवाय, पोलिसांनी त्या तरुणाचा जुरा (केसांची गाठ) जबरदस्तीने सोडवला आणि त्याची दाढी अन् केस ओढले, जो त्याच्या शिख धार्मिक भावनांवर आणि अस्मितेवर झालेला थेट हल्ला आहे. एका पोलीस उपअधीक्षक दर्जाच्या अधिकाऱ्याने या तरुणाच्या वृद्ध आई आणि बहिणीचाही छळ करून त्यांना अपमानित केल्याचा आरोप भाजप नेत्याने केला आहे.

पीड़ित तरुण आणि त्याच्या कुटुंबाला राज्य प्रशासनाकडून गंभीर धमक्या येत असल्याने त्यांना उच्चस्तरीय सुरक्षा आणि वैद्यकीय मदत पुरवण्यात यावी, अशी विनंतीही तरुण चुघ यांनी आयोगाकडे केली आहे.