Shrikant Shinde Convoy Accident : शिवसेनेच्या ‘शिवसंवाद यात्रे’साठी नांदेड जिल्ह्याच्या दौऱ्यावर असलेले खासदार श्रीकांत शिंदे (Shrikant Shinde Convoy Accident) यांच्या ताफ्यातील गाड्यांना भीषण अपघात झाला आहे.

या अपघातात (Shrikant Shinde Convoy Accident) ताफ्यातील चार गाड्या एकमेकांवर जोरदार आदळल्या असून वाहनांचे मोठे नुकसान झाले आहे. सुदैवाने, या अपघातात कोणतीही जीवितहानी झालेली नाही आणि सर्वजण पूर्णपणे सुरक्षित आहेत.

खासदार श्रीकांत शिंदे यांचा ताफा नांदेडहून नायगावकडे जात असताना हा अपघात झाला. ताफा महामार्गावरून पुढे सरकत असताना अचानक समोरून एक गाडी आली. त्या गाडीला वाचवण्याच्या प्रयत्नात ताफ्यातील चालकांनी तातडीने ब्रेक दाबले, मात्र वेग जास्त असल्याने ताफ्यातील चार गाड्या एकापाठोपाठ एक एकमेकांवर जाऊन धडकल्या.

या अपघातग्रस्त गाड्यांमध्ये शिवसेनेचे काही कार्यकर्ते आणि आरोग्य विभागाचे कर्मचारी प्रवास करत होते. गाड्यांचे मोठ्या प्रमाणावर नुकसान झाले असले, तरी सुदैवाने यात कोणालाही गंभीर किंवा किरकोळ दुखापत झालेली नाही.

या अपघाताच्या घटनेनंतरही खासदार श्रीकांत शिंदे यांनी आपला नियोजित दौरा सुरूच ठेवला. त्यांनी नायगाव, मुखेड आणि देगलूर विधानसभा मतदारसंघांची महत्त्वपूर्ण आढावा बैठक घेतली.

आगामी जिल्हा परिषद आणि पंचायत समिती निवडणुकांच्या पार्श्वभूमीवर या बैठकीत विस्तृत रणनीती आखण्यात आली. यात प्रामुख्याने पक्षाची संघटनात्मक बांधणी, बूथनिहाय सूक्ष्म नियोजन, ग्रामीण भागातील पक्ष विस्तार आणि जनसंपर्क अभियान या विषयांवर सखोल चर्चा करण्यात आली.

शिवसेनेचा विचार प्रत्येक गाव, वाडी आणि घराघरापर्यंत पोहोचवण्यासाठी कार्यकर्त्यांनी अधिक जोमाने मैदानात उतरावे, जनतेशी सातत्याने जिवंत संपर्क ठेवावा आणि स्थानिक प्रश्नांवर तत्काळ पाठपुरावा करावा, अशा कडक सूचना खासदार शिंदे यांनी यावेळी उपस्थित पदाधिकाऱ्यांना व कार्यकर्त्यांना दिल्या.

मार्गदर्शन करताना खासदार श्रीकांत शिंदे (Shrikant Shinde Convoy Accident) म्हणाले की, शिवसेना हा केवळ एक राजकीय पक्ष नसून, तो सामान्य माणसाच्या हक्कासाठी लढणारी एक मोठी ताकद आहे. ही ताकद आणखी मजबूत करायची असेल, तर प्रत्येक शिवसैनिकाने आतापासूनच आपल्या पूर्ण क्षमतेने आणि प्रामाणिकपणे कामाला लागणे गरजेचे आहे.

या बैठकीत ‘एसआयआर’ (SIR) मोहिमेअंतर्गत मतदार याद्या अद्ययावत करणे, नवीन मतदार नोंदणी वाढवणे, युवा मतदार आणि शासकीय योजनांच्या लाभार्थ्यांशी थेट संपर्क साधणे, तसेच प्रत्येक बूथवर संघटनेची पकड मजबूत करणे यावर विशेष भर देण्यात आला.

आगामी निवडणुकांमध्ये घवघवीत विजय मिळवायचा असेल, तर बीएलए (BLA), शाखाप्रमुख आणि सर्व पदाधिकाऱ्यांनी बूथ पातळीवर अधिक सक्रिय होऊन पूर्णपणे झोकून देऊन काम करावे, असे आवाहनही त्यांनी शेवटी केले.