Shreyas Captaincy Challenge : श्रेयस अय्यरसमोर सर्वात मोठं आव्हान! २४ वर्षांत भारतात जे घडलं नाही, ते चिन्नास्वामीवर घडणार का?
Shreyas Captaincy Challenge : भारत आणि वेस्ट इंडिज यांच्यात सुरू असलेल्या टी-२० मालिकेतील पाचवा आणि अंतिम सामना १७ ऑक्टोबर रोजी खेळवला जाणार आहे. या सामन्यात भारतीय संघाचा कर्णधार श्रेयस अय्यरसमोर मोठे आव्हान असेल.
Shreyas Iyer Faces Massive Challenge Against West Indies in Bengaluru T20I Series Decider : भारतीय टी-२० क्रिकेट संघाचा कर्णधार श्रेयस अय्यरसमोर शनिवारी कारकिर्दीतील सर्वात मोठी कसोटी उभी ठाकणार आहे. भारत आणि वेस्ट इंडिज यांच्यातील पाच टी-२० सामन्यांच्या मालिकेतील पाचवा आणि निर्णायक सामना १७ ऑक्टोबर रोजी बंगळुरूच्या एम चिन्नास्वामी स्टेडियमवर खेळवला जाणार आहे. आतापर्यंत चार सामन्यांनंतर मालिका २-२ अशी बरोबरीत असून, घरच्या मैदानावरील २४ वर्षांची अजिंक्य परंपरा कायम राखण्याची सर्व जबाबदारी आता श्रेयसच्या खांद्यावर आली आहे.
भारतात विंडीजविरुद्ध कधीही मालिका न गमावण्याचा विक्रम धोक्यात –
भारतीय क्रिकेट संघाने आपल्या घरच्या मैदानावर वेस्ट इंडिजविरुद्ध कधीही आंतरराष्ट्रीय टी-२० मालिका गमावलेली नाही. इतकेच नाही तर २००२ नंतर भारतीय संघ मायदेशात वेस्ट इंडिजकडून कसोटी, एकदिवसीय किंवा टी-२० अशा कोणत्याही फॉरमॅटमध्ये मालिका हरलेला नाही. मात्र हैदराबादमधील पराभवानंतर मालिका बरोबरीत आल्याने हा २४ वर्षांचा अभेद्य विक्रम मोडीत निघण्याची भीती निर्माण झाली आहे. २००९ च्या विश्वचषकात पहिल्यांदा समोरासमोर आल्यानंतर दोन्ही देशांमध्ये अनेक चुरशीच्या लढती झाल्या, पण घरच्या मैदानावर भारताचा वरचष्मा राहिला आहे.
२०२३ मध्ये विंडीजने मायदेशात भारताला चारली होती धूळ –
Shreyas Iyer leads the list with 37 200+ totals as captain in T20s, followed by MS Dhoni (36) and Virat Kohli (29)! 🔥🏏 https://t.co/ClQGkaUkr4
— Crickdom (@CrickdomOffl) October 16, 2026
वेस्ट इंडिजने भारताला अखेरचे २०२३ मध्ये टी-२० मालिकेत पराभूत केले होते, मात्र ती मालिका कॅरेबियन भूमीवर खेळवली गेली होती. त्या पाच सामन्यांच्या मालिकेत विंडीजने भारताचा ३-२ असा पराभव केला होता. आता भारतात येऊन तीच पुनरावृत्ती करण्याची सुवर्णसंधी पाहुण्या संघाला मिळाली असून टीम इंडियासमोर मालिका वाचवण्याचे मोठे आव्हान उभे राहिले आहे.
फॉर्मात असलेला शाई होप भारतासाठी सर्वात मोठा धोका –
या निर्णायक लढतीत भारतीय संघासाठी सर्वात मोठी डोकेदुखी ठरत आहे तो विंडीजचा कर्णधार शाई होप. होपने चालू दौऱ्यात आधीच तीन शतके झळकावून भारतीय माऱ्याची लक्तरे वेशीवर टांगली आहेत. चिन्नास्वामीच्या छोट्या मैदानावर पुन्हा एकदा त्याची बॅट तळपली तर भारतासाठी मालिका जिंकणे अत्यंत कठीण होईल. त्यामुळे श्रेयस अय्यर आणि गोलंदाजांना होपला रोखण्यासाठी विशेष रणनीती आखावी लागणार आहे.
