नवी दिल्ली : सध्या क्रेडिट कार्ड कंपन्या जोरदार मार्केटिंग करत आहेत. त्यामुळे जवळपास सगळ्यांकडे पुन्हा एकदा क्रेडिट कार्ड दिसू लागली आहेत. क्रेडिट कार्डचा वापरही वाढू लागला आहे. त्याचबरोबर आजकाल कोणत्याही वस्तूंच्या खरेदीसाठी क्रेडिट कार्डचा वापर केला जातो. अगदी महिन्याचे धान्य भरण्यासाठी देखील क्रेडिट कार्डचा वापर केला जातो. मात्र क्रेडिट कार्डचा वापर करून घरभाडे भरणे योग्य की नाही याबाबत विचार करणे आवश्यक आहे.

घरभाडे भरण्यासाठी तुम्ही क्रेडिट कार्डचा वापर केला आणि जर का तुम्ही क्रेडिट कार्डचे बिल पेमेंट वेळेवर चुकते केले नाही तर तुमचा क्रेडिट स्कोअर खराब होऊ शकतो. जर तुम्ही सर्व क्रेडिट कार्ड बिले वेळेवर भरली तर चिंता करण्याची गरज नाही. मात्र क्रेडिट कार्ड बिले वेळेवर भरली नाही आणि क्रेडिट स्कोअर खराब झाला तर कर्ज घेताना तुम्हाला अडचणी येऊ शकतात.

सर्वसाधारणपणे घरभाड्याचे पटकन पेमेंट करण्यासाठी क्रेडिट कार्डचा वापर केला जातो. आता तर एटीएम मध्ये जा, पैसे काढा आणि घरमालकाला नेऊन द्या यापेक्षा इंटरनेट बँकिंग यूपीआय किंवा क्रेडिट कार्डचा वापर केला जातो. यात क्रेडिट कार्डचा वापर करण्याचे मुख्य कारण म्हणजे लगेच खिशातून पैसे जाणार नसतात. त्यामुळे घर भाड्याचे पैसे क्रेडिट कार्डने देण्याचा मार्ग लोकप्रिय होऊ लागला आहे.

क्रेडिट कार्ड वापरणारी व्यक्ती क्रेड किंवा पेटीएम सारख्या प्लॅटफॉर्म द्वारे घर भाडे देऊ शकतात. मात्र तज्ञांच्या मते घरभाडे क्रेडिट कार्डद्वारे देऊ नये. क्रेडिट कार्ड हे आता एक फायनान्शिअल टूल म्हणून काम करते. सर्वसाधारणपणे पैशाची अडचण असेल आणि आणीबाणीची स्थिती असेल तेव्हाच क्रेडिट कार्डचा वापर केला जावा. परंतु गेल्या काही वर्षात अगदी किरणामालाचे बिल ते पासून कॅब चे भाडे देण्यापर्यंत क्रेडिट कार्डचा वापर केला जातो. घरभाडे भरताना अर्थातच पेटीएम किंवा क्रेड सारख्या प्लॅटफॉर्म द्वारे हे पेमेंट होते अशावेळी या सेवेसाठी हे प्लॅटफॉर्म 0.4 ते दोन टक्क्यांपर्यंत सेवा शुल्क आकारतात.

पगारदार लोकांसाठी घरभाडे हा एक प्रमुख खर्च असतो. क्रेडिट कार्डधारक शक्यतो एटीएम ला जायला लागू नये म्हणून क्रेडिट कार्डद्वारे घरभाडे देतात. अनेकदा पैसे कमी असले तरी क्रेडिट कार्डद्वारे भाडे दिले जाते. काही जण रिवॉर्ड पॉइंट मिळतात म्हणूनही क्रेडिट कार्डचा भाडे देण्यासाठी वापर करतात. मात्र हे रिवॉर्ड पॉइंट आपल्याला सेवाशुल्काच्या बदल्यात दिले जातात आणि सेवाशुल्काचा विचार केला तर आपल्यासाठी आतबट्ट्याचा व्यवहार असतो.

आयसीआयसीआय बँकेच्या क्रेडिट कार्डद्वारे तुम्ही भाडे अदा केले तर आता तुम्हाला एक टक्का सेवा शुल्क लागू होते. तज्ञांच्या मते तुम्ही घरभाडे देण्यासाठी क्रेडिट कार्डचा वापर टाळला पाहिजे. त्यांच्या सांगण्यानुसार घर भाडे हा नियमित खर्च असतो. हा अचानक आलेला खर्च नसतो. त्यामुळे घरभाडे देणे हा मुद्दा आपल्या मासिक आर्थिक नियोजनात असायलाच हवा.

दर महिन्याला घर भाडे द्यायचे आहे याची आपल्याला कल्पना असते. त्यामुळे त्याचा समावेश महिन्याच्या खर्चात फायदा हवा तरच आपल्याकडून क्रेडिट कार्डचा योग्य तो वापर होऊ शकतो. क्रेडिट कार्डचा वापर प्रामुख्याने अनपेक्षित खर्चासाठी किंवा अतिशय निकडीच्या वेळी करणे अपेक्षित असते. लोक आता रिवॉर्ड पॉइंट मिळवण्यासाठी क्रेडिट कार्डचा उपयोग करू लागल्याने संबंधित सेवा देणाऱ्या कंपन्यांनी अशा व्यवहारांवर सेवा शुल्क लागू करणे सुरू केले आहे. त्यामुळे घरभाड्याबरोबरच तुम्हाला अतिरिक्त रक्कम द्यावी लागते हे लक्षात लक्षात घेऊन घरभाडे क्रेडिट कार्डद्वारे देणे टाळावे.