Supriya Sule : मुख्य निवडणूक आयुक्त ज्ञानेश कुमार यांनी राजीनामा द्यावा का? सुप्रिया सुळे म्हणाल्या…
Supriya Sule : या पार्श्वभूमीवर विरोधकांकडून निवडणूक आयोगाच्या कार्यपद्धतीवर टीका करत प्रश्न उपस्थित केले जात आहेत.
Supriya Sule : निवडणूक आयोगातील अंतर्गत मतभेदांच्या चर्चांना सध्या उधाण आले आहे. मुख्य निवडणूक आयुक्त ज्ञानेश कुमार यांच्या कार्यपद्धतीवर त्यांच्या दोन सहकाऱ्यांनी लेखी आक्षेप नोंदवल्याची धक्कादायक माहिती समोर आली आहे.
यातील काही पत्रव्यवहार थेट कॅबिनेट सचिवांपर्यंत पोहोचल्याचेही समोर आले आहे. यामुळे एकच खळबळ उडाली असून, या पार्श्वभूमीवर विरोधकांकडून निवडणूक आयोगाच्या कार्यपद्धतीवर टीका करत प्रश्न उपस्थित केले जात आहेत.
राष्ट्रवादी काँग्रेस (शरदचंद्र पवार) पक्षाच्या खासदार सुप्रिया सुळे यांनी या प्रकरणावर प्रतिक्रिया देताना चिंता व्यक्त केली. “निवडणूक आयोगावरील आरोप बाहेरच्या व्यक्तींकडून नव्हे, तर त्याच संस्थेतील लोकांकडून होत आहेत. जर सिस्टिमच कोसळत असेल, तर कुणावर विश्वास ठेवायचा?” असा सवाल त्यांनी उपस्थित केला.
सुप्रिया सुळे म्हणाल्या, “मला आश्चर्य वाटत आहे आणि धक्काही बसला आहे. आमच्यावर अन्याय झाला, उद्धव ठाकरे यांच्यावरही अन्याय झाला, हा राजकीय मुद्दा म्हणून बाजूला ठेवूया. मात्र, सामान्य नागरिकांच्या घटनात्मक अधिकारांमध्ये गल्लत होत असेल, तर ही अत्यंत चिंताजनक बाब आहे. हा केवळ राजकीय विषय नाही, तर लोकशाहीशी संबंधित महत्त्वाचा विषय आहे.”
ज्ञानेश कुमार यांनी राजीनामा द्यावा का, असा प्रश्न विचारण्यात आला असता सुळे यांनी “नैतिकता दाखवली पाहिजे,” अशी प्रतिक्रिया दिली. भारत हा जगातील मोठ्या लोकशाही देशांपैकी एक असून प्रत्येक नागरिकाला समान मतदानाचा अधिकार संविधानाने दिला आहे, असे त्यांनी बोलताना नमूद केले.
संजय राऊत यांचीही टीका (Supriya Sule)
या प्रकरणावर शिवसेना उद्धव बाळासाहेब ठाकरे गटाचे खासदार संजय राऊत केंद्र सरकारवर टीका करत मोठं वक्तव्य केले. ते म्हणाले “अमित शाह आणि ज्ञानेश कुमारने मिळून या देशाचं वाटोळं केलेलं आहे. लोकशाहीची इतकी मोठी हत्या यापूर्वी कोणी केली नव्हती.
नेमकं प्रकरण काय? (Supriya Sule)
एका प्रसिद्ध इंग्रजी दैनिकाच्या तपासणीनुसार, गेल्या १० महिन्यांत निवडणूक आयुक्त सुखबीर सिंह संधू आणि विवेक जोशी यांनी मुख्य निवडणूक आयुक्त ज्ञानेश कुमार यांच्या निर्णयांवर आणि आयोगाच्या काही प्रक्रियांवर किमान १४ वेळा अधिकृतपणे लेखी आक्षेप नोंदवले आहेत.
या आक्षेपांमध्ये मतदार यादीतील बदल, नवीन मतदारांची नोंदणी आणि निवडणूक आयोगाच्या आयटी प्रणालीच्या केंद्रीकरणासह विविध मुद्द्यांचा समावेश आहे. आयटी व्यवस्थेतील अधिकारांच्या केंद्रीकरणाबाबत दोन्ही निवडणूक आयुक्तांनी चिंता व्यक्त केली होती.
दरम्यान, निवडणूक आयोगाने एसआयआरसह सर्व निर्णय एकमताने घेतले जात असल्याचे म्हटल्याचेही वृत्त आहे. त्यामुळे आयोगातील अंतर्गत मतभेदांवरून सध्या राजकीय आणि प्रशासकीय पातळीवर वातावरण चांगलेच तापले आहे.
