पिंपरी (प्रतिनिधी) – पूर्वी झालेल्‍या भांडणाच्या कारणावरून तळेगावमध्ये एका तरुणावर गोळीबार करण्‍यात आला. ही घटना मंगळवारी (दि. 23) रात्री साडेअकरा वाजताच्या सुमारास तळेगाव येथील भेगडे आळी येथे घडली.

आदित्य भेगडे (रा. तळेगाव दाभाडे) असे गोळीबारात जखमी झालेल्‍या तरुणाचे नाव आहे. वरिष्ठ पोलीस निरीक्षक किशोर पाटील यांनी दिलेल्या माहितीनुसार, अल्‍पवयीन आरोपी आणि जखमी आदित्य भेगडे हे पोलीस रेकॉर्डवरील गुन्हेगार आहेत. त्यांच्यात पूर्वीपासून वाद आहेत. मंगळवारी रात्री साडअकराच्या सुमारास भेगडे आळी तळेगाव दाभाडे येथे ते एकमेकांच्या समोरासमोर आले.

एकमेकांकडे पाहण्याच्या कारणावरून त्यांच्यात वाद झाला आणि अल्‍पवयीन आरोपीने आदित्यवर गोळीबार केला. यामध्ये आदित्यच्‍या खांद्याला गोळी लागून तो किरकोळ जखमी झाला आहे. त्यानंतर अल्‍पवयीन आरोपी पळून गेला. तळेगाव दाभाडे पोलीस तपास करीत आहेत.