प्रभात वृत्तसेवा पुणे – मुल होत नसल्याने पतीने आपल्या पत्नीचा गळा आवाळून खून केल्याची धक्कादायक घटना हडपसरमधील भेकराईनगर परिसरात घडली. पत्नीच्या खुनानंतर पती पोलीस ठाण्यात स्वत:हून हजर झाला.प्रियांका आकाश दोडके ( २७, रा. गुरुदत्त काॅलनी, भेकराईनगर, फुरसुंगी) असे खून झालेल्या विवाहितेचे नाव आहे. याप्रकरणी पती आकाश विष्णू दोडके (वय ३५) याला अटक केली आहे. याबाबत प्रियांका यांचा भाऊ सागर रामदास अडागळे (वय ३५, रा. नानगाव, ता. दौंड) यांनी फुरसुंगी पोलीस ठाण्यात फिर्याद दिली आहे.पोलिसांच्या माहितीनुसार, आकाश आणि प्रियांका यांचा २०१८ मध्ये विवाह झाला होता. आकाश हा खासगी वाहनावर चालक म्हणून काम करत होता. आकाशचे आई-वडील, भाऊ सिंहगड रस्ता भागात राहतात. विवाहानंतर मुल होत नसल्याने प्रियांका-आकाशमध्ये नेहमी वाद व्हायचे. गेल्या काही दिवसांपासून तो प्रियांकाच्या चारित्र्यावर संशय घ्यायचा. त्याने प्रियांकाशी वाद घालून तिला मारहाण करण्यासही सुरुवात केली. शुक्रवारी (२६ डिसेंबर) रात्री प्रियांका आणि आकाश यांच्यात पुन्हा वाद झाला. त्याने प्रियांकाला मारहाण करुन गळा आवळून खून केला. ती बेशुद्ध पडल्यानंतर तो पोलीस चौकीत गेला आणि पत्नीचा खून केल्याची कबुली दिली. पोलिसांनी घटनास्थळी भेट दिली. तिला तातडीने रुग्णालयात दाखल केले. उपचारांपुर्वीच ती मरण पावल्याचे डाॅक्टरांनी सांगितले. पत्नीचा खून केल्याप्रकरणी आरोपी आकाश याला पोलिसांनी अटक केली असून, सहायक पोलीस निरीक्षक नानासाहेब जाधव तपास करत आहेत.
