Kondhwa atrocities case :  पुण्यातील कोंढवा परिसरातील एका उच्चभ्रू सोसायटीतील संगणक अभियंता तरुणीवर अत्याचार झाल्याची बातमी समोर आली होती. यानंतर पुण्यात मोठी खळबळ उडाली होती. आरोपी कुरिअर बॅाय असल्याचे सांगत घरात शिरून तोंडावर स्प्रे मारून अत्याचार केल्याचा आरोप करण्यात आला होता. मात्र, पोलिसांनी केलेल्या तपासात वेगळ्याच बाबी समोर आल्याने खळबळ उडाली आहे.

सुरुवातीला तरुणीने संबंधित तरुणाला ओळखत नसल्याचे पोलिसांना सांगितले. मात्र, पोलिसांनी सादर केलेल्या पुराव्यांवरून ती त्याला ओळखत असल्याचे तिने मान्य केले. आता या प्रकरणात नवी माहिती समोर आली आहे. पोलिसांनी या प्रकरणातील संशयित आरोपी तरुणाला अटक न करता नोटीस बजावली आहे. तपासात सहकार्य करणे आणि पोलिसांनी बोलावल्यास ठाण्यात हजर राहण्याच्या अटीसह ही नोटीस देण्यात आल्याची माहिती उपायुक्त डॉ. राजकुमार शिंदे यांनी दिली.

तपासादरम्यान वेगळ्याच गोष्टी समोर

कोंढवा येथील घटनेची पोलिसांनी गांभीर्याने दखल घेत तपास सुरू केला. या तपासादरम्यान वेगळ्याच गोष्टी समोर आल्या आहेत. संबंधित तरुण तरुणी गेल्या अनेक दिवसांपासून मित्र असून ते नियमित एकमेकांना भेटायचे, दोघांमध्ये बोलणं देखील व्हायचे. या प्रकरणात तरुणीने तोंडावर स्प्रे मारल्याचा आरोप केला होता. मात्र, पोलिसांनी केलेल्या तपासात असे काही घडले नसून तरणीनेच त्याला फोन करून घरी बोलावले होते, अशी माहिती समोर आली आहे. यामुळे आता तरुणीने तक्रारीचे कारण काय होते, याबाबतचा तपास पोलीस करत आहेत.

तो फोटो तरुणीनेच…

कोंढव्यातील घटना समोर आल्यानंतर आरोपीने तोंडावर स्प्रे फवारून अत्याचार केल्याचे तक्रारीत म्हटले होते. तसेच फोटो काढून मी परत येईल अशी धमकी दिली होती, असेही तक्रारीत म्हटले होते. मात्र, पोलिसांनी केलेल्या तपासात  तो फोटो तरुणीनेच अँपद्वारे एडिट केल्याचे समोर आले आहे. या प्रकरणातील गुंतागुंत पाहता पोलिसांनी सध्या आरोपीला अटक न करता नोटीस देऊन सोडले आहे. तरुणीनेही काही गोष्टी चुकीच्या मान्य केले आहे.

हेही वाचा : दोस्त बना दुश्मन ! एलॉन मस्क अमेरिकेत तिसरा मोठा पक्ष स्थापन करणार ; आता डोनाल्ड ट्रम्पशी थेट लढाई