नवी दिल्ली – समाजवादी पक्षाचे संस्थापक मुलायमसिंह यादव यांच्या सुनबाई अपर्णा यादव यांनी आज भारतीय जनता पक्षात प्रवेश केला. गेले काही दिवस त्या या पक्षाच्या संपर्कात होत्या. त्या मुलायमसिंह यादव यांच्या दुसऱ्या पत्नीच्या मुलाच्या पत्नी आहेत.

उत्तरप्रदेशचे उपमुख्यमंत्री केशवप्रसाद मौर्य आणि प्रदेश भाजप अध्यक्ष स्वतंत्र देवसिंह यांच्या उपस्थितीत त्यांनी भाजपमध्ये प्रवेश केला. त्यांच्या या प्रवेशामुळे भाजपला थोडा दिलासा मिळाला आहे. गेले काही दिवस पक्षातून मोठ्या प्रमाणात गळती सुरू झाली आहे. तीन मंत्री आणि सुमारे दहा आमदार पक्ष सोडून समाजवादी पक्षाला मिळाले आहेत.

आता मुलायमसिंह यादव यांच्या घरातीलच एक महत्वाचा सदस्य आपल्या पक्षात आल्याने भाजपच्या गोटात जरा समाधानाचे वातावरण आहे. अपर्णा यादव यांना आता पक्षाकडून विधानसभेची उमेदवारी दिली जाण्याची शक्‍यता आहे.

अपर्णा यांनी 2017 ची निवडणुक लखनौ कॅन्टोन्मेंट मतदार संघातून समाजवादी पक्षाच्या तिकीटावर लढवली होती. पण त्यांना भाजपच्या उमेदवार रिटा बहुगुणा यांच्याकडून पराभूत व्हावे लागले होते.