Anil Parab | अभिनेता विकी कौशलची प्रमुख भूमिका असलेला छावा चित्रपट सध्या चर्चेत आहे. यातच आता शिवसेनेचे (ठाकरे) नेते अनिल परब यांनी छावा चित्रपटाचा संदर्भ देत केलेल्या वक्तव्याची चर्चा रंगली आहे. ‘छत्रपती संभाजी महाराजांनी धर्म बदलावा म्हणून त्यांचा छळ झाला आणि पक्ष बदलावा म्हणून माझा छळ झाला’, असे विधान वक्तव्य अनिल परब यांनी केले आहे. अनिल परब यांनी स्वतःची तुलना छत्रपती संभाजी महाराजांसोबत केल्याने आता त्यांच्यावर जोरदार टीका केली जात आहे.

राज्यपालांच्या अभिभाषणावरील चर्चेवर बोलताना अनिल परब यांनी छत्रपती संभाजी महाराजांचा उल्लेख करत हे वक्तव्य केले. ते म्हणाले की, प्रशांत कोरडकर आणि राहुल सोलापूरकर यांनी छत्रपती संभाजी महाराजांचा अपमान केला. परंतु त्यांच्यावर कारवाई करण्याची सरकारी हिंमत नाही. तुम्ही त्यांना वाचवतात आणि राज्यपालांना चुकीची माहिती देता.

धर्म बदलण्यासाठी छत्रपती संभाजी महाराजांचा छळ झाला. माझ्यावर पक्ष बदलण्यासाठी छळ झाला. मी सगळे भोगले, पण पक्ष बदलला नाही. बाकी सर्वांना जरा हूल दिली की, लगेच गेले पक्ष सोडून., असे वक्तव्य त्यांनी विधानपरिषदेत बोलताना केले.

माझ्यावरही ईडी आणि सीबीआयची कारवाई झाली. संजय राऊत थोडं कच्चे निघाले, परंतु मी पुरून उरलो. माझ्यावर अत्याचार झालेले आहेत. मी त्यांचा वारसा जपणारा आहे. पक्ष बदलला नाही, याचा मला अभिमान आहे., असे वक्तव्य त्यांनी केले. दरम्यान, अनिल परब यांनी स्वतःची छत्रपती संभाजी महाराजांबद्दल तुलना केल्याने त्यांच्यावर टीका केली जात आहे. भाजपकडून त्यांच्याविरोधात आंदोलन केले जाणार आहे.