मुंबई : आशिया कप 2025 मधील पहिल्याच सामन्यात भारतीय क्रिकेट संघाने संयुक्त अरब अमिराती (युएई) संघाला 9 विकेटने पराभूत करत दमदार सुरुवात केली. युएईने ठेवलेले 58 धावांचे आव्हान भारतीय सलामीवीरांनी अवघ्या 4.3 षटकांत पूर्ण करत विजय मिळवला. या सामन्यात ऑलराऊंडर शिवम दुबेने 3 विकेट घेत मोलाची कामगिरी केली, तर सामन्यानंतर त्याने हार्दिक पांड्याबाबत केलेल्या विधानाची जोरदार चर्चा रंगली आहे.

कसा झाला सामना ?
भारताचा कर्णधार सूर्यकुमार यादवने नाणेफेक जिंकून प्रथम गोलंदाजीचा निर्णय घेतला. युएईच्या सलामीवीरांनी सुरुवात चांगली केली होती. अलिशान शराफूने 17 चेंडूत 22 धावा, तर मुहम्मद वसीमने 19 धावा केल्या. मात्र, यानंतर युएईचा डाव गडगडला आणि अवघ्या 13.1 षटकांत त्यांचा संपूर्ण संघ 57 धावांवर गारद झाला. भारताच्या गोलंदाजांनी जबरदस्त कामगिरी केली.

कुलदीप यादवने 4 विकेट, शिवम दुबेने 3 विकेट, तर जसप्रीत बुमराह, अक्षर पटेल आणि वरुण चक्रवर्ती यांनी प्रत्येकी 1 विकेट घेतली.58 धावांच्या लक्ष्याचा पाठलाग करताना भारताने आक्रमक सुरुवात केली. सलामीवीर अभिषेक शर्माने 30 धावा, शुभमन गिलने 20 धावा आणि कर्णधार सूर्यकुमार यादव 7 धावांवर नाबाद राहिला. भारताने 4.3 षटकांत 1 विकेट गमावत हा सामना सहज जिंकला.

शिवम दुबेचे हार्दिक पांड्याबाबत विधान
सामन्यात तीन विकेट घेतल्यानंतर शिवम दुबेचा आत्मविश्वास उफाळून आला होता. सामन्यानंतर माध्यमांशी बोलताना त्याने हार्दिक पांड्याबाबत मोठे विधान केले. “हार्दिक पांड्या माझ्यासाठी भावासारखा आहे. त्याच्याशी माझी तुलना होऊ शकत नाही. मी नेहमीच त्याच्या सल्ल्यांमधून आणि अंतर्दृष्टीतून शिकत असतो,” असे दुबे म्हणाला. या विधानामुळे क्रिकेट चाहत्यांमध्ये चर्चेला उधाण आले आहे. या सामन्यात हार्दिकला एकही विकेट मिळाली नाही, तर दुबेने आपल्या वेगवान गोलंदाजीने युएईच्या फलंदाजांना हैराण केले.

दोन्ही संघांची प्लेइंग इलेव्हन
भारत: अभिषेक शर्मा, शुभमन गिल, सूर्यकुमार यादव (कर्णधार), तिलक वर्मा, संजू सॅमसन (यष्टिरक्षक), शिवम दुबे, हार्दिक पांड्या, अक्षर पटेल, कुलदीप यादव, जसप्रीत बुमराह, वरुण चक्रवर्ती.

युएई: मुहम्मद वसीम (कर्णधार), अलिशान शराफू, मुहम्मद जोहैब, राहुल चोप्रा (यष्टिरक्षक), आसिफ खान, हर्षित कौशिक, हैदर अली, ध्रुव पराशर, मुहम्मद रोहीद खान, जुनैद सिद्दिकी, सिमरनजीत सिंग.